Murder: ଭୁବନେଶ୍ୱର (ରିପୋଟର୍ସ ପେନ୍) : ମାତ୍ର କେଇଟା ଟଙ୍କା ଲାଗି ସାଙ୍ଗ ସାଜିଲା ବଇରୀ। ପଥରରେ ଛେଚି ନିଜର ଦୀର୍ଘଦିନର ବନ୍ଧୁକୁ ହତ୍ୟା କରିଛି ଜଣେ ବନ୍ଧୁ। ଏଭଳି ଘଟଣା ସାମ୍ନାକୁ ଆସିଛି ଭରତପୁର ଥାନା ଅନ୍ତର୍ଗତ ସୋମନାଥ ବସ୍ତିରେ। ଉକ୍ତ ବସ୍ତିରେ ରହୁଥିବା କୈଳାଶ ନାୟକ (୩୭) ନାମକ ଜଣେ ଯୁବକଙ୍କୁ ତାଙ୍କର ଜଣେ ବନ୍ଧୁ ଗଞ୍ଜାମ ଜିଲ୍ଲା ବୁଗୁଡ଼ା ଅଞ୍ଚଳର ନରହରି ପଥରରେ ଛେଚି ହତ୍ୟା କରିଥିବା ନେଇ ମୃତ କୈଳାଶଙ୍କ ମା’ ଦେବୀନା ନାୟକ ଥାନାରେ ଲିଖିତ ଅଭିଯୋଗ କରିଛନ୍ତି। େପାଲିସ ଅଭିଯୋଗ ଆଧାରରେ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିବା ସହ ମୃତ ଦେହକୁ ଜବତ କରି ବ୍ୟବଚ୍ଛେଦ ଲାଗି ହସ୍ପିଟାଲ ପଠାଇଥିଲା। ପରେ ଘଟଣାସ୍ଥଳରେ ସାଇଣ୍ଟିଫିକ ଟିମର ସଦସ୍ୟମାନେ ପହଞ୍ଚି ତନାଘନା କରିବା ସହ ଚଟାଣରେ ପଡ଼ିଥିବା ରକ୍ତଛିଟାର ନମୁନାକୁ ସଂଗ୍ରହ କରିବା ସହ ହତ୍ୟାରେ ବ୍ୟବହୃତ ହୋଇଥିବା ଏକ ସିମେଣ୍ଟ ଇଟାକୁ ଜବତ କରିଛନ୍ତି।
ମିଳିଥିବା ସୂଚନା ଅନୁଯାୟୀ, ସୋମନାଥ ବସ୍ତିରେ ହତ୍ୟାର ଶିକାର କୈଳାଶ ନିଜ ମା’ ଦେବୀନା ସହ ଦୀର୍ଘଦିନ ହେବ ରହି ଆସୁଥିଲେ। ଗୁରୁବାର ଅପରାହ୍ଣରେ ତରକାରୀରେ ଲୁଣ ପକାଇ ନ ଥିବାରୁ କୈଳାଶ ନିଜ ମା’ ଉପରେ ଅତ୍ୟଧିକ ବିରକ୍ତି ହେବା ସହ ତାଙ୍କୁ ଗାଲିଗୁଲଜ କରିଥିଲା। ପରେ ମା’ ଦେବୀନା ଘର ଛାଡ଼ି ନିକଟସ୍ଥ ତାଙ୍କ ସମ୍ପର୍କୀୟଙ୍କ ଘରକୁ ପଳାଇଥିଲେ। ରାତି ପ୍ରାୟ ୮ଟା ବେଳେ କୈଳାଶଙ୍କ ବନ୍ଧୁ ନରହରି ତାଙ୍କ ନିକଟକୁ ଆସିଥିଲା। ପରେ ଉଭୟ ମଦ କିଣିବାକୁ ସାଙ୍ଗରେ ଯାଇଥିଲେ। ଉଭୟ ବିଳମ୍ବିତ ରାତି ପର୍ଯ୍ୟନ୍ତ ମଦ୍ୟପାନ କରିବା ସହ ଘରେ ପାଟିତୁଣ୍ଡ କରୁଥିବା ପଡ଼ିଶା ଲୋକ ପୋଲିସକୁ କହିଛନ୍ତି। କିନ୍ତୁ ଶୁକ୍ରବାର ସକାଳୁ କୈଳାଶଙ୍କ ମା’ ଘରକୁ ଫେରିବା ପରେ ପୁଅ ରକ୍ତଜୁଡ଼ୁବୁଡ଼ୁ ଅବସ୍ଥାରେ ଘର ଚଟାଣରେ ପଡ଼ିଥିବା ଦେଖବାକୁ ପାଇଥିଲେ।
ଏନେଇ ଭରତପୁର ଥାନାଧିକାରୀ ଦୀପକ ଖଣ୍ଡାୟତରାୟ କହିଛନ୍ତି ଯେ, ମାମଲାରେ କୈଳାଶଙ୍କ ବନ୍ଧୁ ନରହରିଙ୍କର ସମ୍ପୃକ୍ତି ରହିଛି କି ନାହିଁ ତାହା ସ୍ପଷ୍ଟ ହୋଇନାହିଁ। ତେବେ ସେ ଗତକାଲି ରାତିରେ କୈଳାଶଙ୍କ ନିକଟକୁ ଆସିଥିବା ନେଇ ପଡ଼ିଶା ଲୋକ କହିଛନ୍ତି। ଏହାବାଦ ଯେହେତୁ ପୂର୍ବରୁ ବିଭିନ୍ନ ଚୋରି ମାମଲାରେ ଉଭୟ କୈଳାଶ ଏବଂ ନରହରି ଜେଲ ଯିବାର ନଜିର ରହିଛି, େତଣୁ ପୂର୍ବ ଚୋରି ଜିନିଷର ଟଙ୍କା ଭାଗବଣ୍ଟାକୁ ନେଇ ଏହି ଗଣ୍ଡଗୋଳ ହୋଇଥିବା ଏବଂ ପରବର୍ତ୍ତୀ ସମୟରେ ନିଶାସକ୍ତ ହୋଇ ନରହରି ହିଁ କୈଳାଶଙ୍କୁ ପଥରରେ ଛେଚି ହତ୍ୟା କରିଥିବା ଅନୁମାନ କରାଯାଉଛି ବୋଲି ଥାନାଧିକାରୀ ଶ୍ରୀ ଖଣ୍ଡାୟତରାୟ ସୂଚନା ଦେଇଛନ୍ତି। ତେବେ ଏ ମାମଲାର ଅଧିକ ତଦନ୍ତ ଚାଲୁଥିବା ପୋଲିସ ସ୍ଥାନୀୟ ଅଞ୍ଚଳରେ ଲାଗିଥିବା ସିସିଟିଭି ଫୁଟେଜ ଯାଞ୍ଚ କରିବା ସହ ଫେରାର ନରହରିଙ୍କ ମୋବାଇଲ ଲୋକେସନକୁ ଯାଞ୍ଚ କରୁଥିବା ଥାନାଧିକାରୀ କହିଛନ୍ତି। ଏଥିସହ ଖୁବଶୀଘ୍ର ଏହି ମାମଲାରେ ଅଭିଯୁକ୍ତ ପୋଲିସ ହାତରେ ଧରାପଡ଼ିବ ବୋଲି ଶ୍ରୀ ଖଣ୍ଡାୟତରାୟ ଦୃଢ଼ତାର ସହ ପ୍ରକାଶ କରିଛନ୍ତି।
