ଭୁବନେଶ୍ୱର (ରିପୋର୍ଟର୍ସ ପେନ୍): ମୂଲ୍ୟବୋଧରେ ପରିଚାଳିତ ଏବଂ ଜ୍ଞାନ ଦ୍ୱାରା ସୂଚିତ ଉତ୍ତମ ପରିଚାଳନା ଜାତୀୟ ବିକାଶ ପଛରେ ଅନ୍ୟତମ ପ୍ରଭାବଶାଳୀ ଶକ୍ତି ଅଟେ । ଗୁରୁବାର ସୋଆ ବିଶ୍ୱବିଦ୍ୟାଳୟଠାରେ ଆୟୋଜିତ ଆସୋସିଏସନ୍ ଅଫ୍ ଇଣ୍ଡିଆନ୍ ମ୍ୟାନେଜମେଣ୍ଟ ସ୍କୁଲ୍ସ (ଇଓଗଝ) ର ବାର୍ଷିକ ମ୍ୟାନେଜମେଣ୍ଟ ସମ୍ମିଳନୀ ୨୦୨୫ ରେ ମୁଖ୍ୟ ଅତିଥି ଭାବେ ଯୋଗ ଦେଇ ଉଦଘାଟନ କରିବା ଅବସରରେ ରାଜ୍ୟପାଳ ଡକ୍ଟର ହରି ବାବୁ କମ୍ଭମପାଟି କହିଛନ୍ତି ।
ଏହା ପରିଚାଳନା ଶିକ୍ଷାକୁ ସୁଦୃଢ଼ କରିବା ଏବଂ ପରବର୍ତ୍ତୀ ପିଢ଼ିର ନେତାମାନଙ୍କୁ ପ୍ରସ୍ତୁତ କରିବା ଦିଗରେ ଭାରତର ପ୍ରତିବଦ୍ଧତାର ପ୍ରତିଫଳନ ବୋଲି ରାଜ୍ୟପାଳ କହିଥିଲେ । ପୂର୍ବ ଭାରତରେ ଶିକ୍ଷା, ଗବେଷଣା ଏବଂ ନବସୃଜନର କେନ୍ଦ୍ର ଭାବେ ଭୁବନେଶ୍ୱରର ଆବିର୍ଭାବକୁ ରାଜ୍ୟପାଳ ପ୍ରଶଂସା କରିଥିଲେ ।ଶିକ୍ଷାର ଭୂମିକା ଉପରେ ଆଲୋକପାତ କରି ରାଜ୍ୟପାଳ କହିଥିଲେ ଯେ ଶିକ୍ଷା ହେଉଛି ଏପରି ଶକ୍ତି ଯାହା ସାମାଜିକ ଏବଂ ଅର୍ଥନୈତିକ ପରିବର୍ତ୍ତନକୁ ଆଗେଇ ନେଇଥାଏ । ଏହା ବ୍ୟକ୍ତିବିଶେଷଙ୍କୁ ସଶକ୍ତ, ଗୋଷ୍ଠୀକୁ ମଜବୁତ ଏବଂ ଦେଶକୁ ସ୍ପଷ୍ଟତାର ସହିତ ଆହ୍ୱାନର ସମ୍ମୁଖୀନ କରିବାକୁ ସକ୍ଷମ କରିଥାଏ ।
ଶିକ୍ଷାନୁଷ୍ଠାନଗୁଡ଼ିକ କୃତ୍ରିମ ବୁଦ୍ଧିମତା, ମେସିନ୍ ଲର୍ଣ୍ଣିଂ, ବିଗ୍ ଡାଟା ଏବଂ ଡିଜିଟାଲ୍ ଉପକରଣଗୁଡ଼ିକୁ ବୁଦ୍ଧିମତା, ଦଳଗତ କାର୍ଯ୍ୟ, ନେତୃତ୍ୱ ଏବଂ ନୈତିକ ଚିନ୍ତାଧାରା ସହିତ ଏକୀକୃତ କରୁଛନ୍ତି ଯାହା ଦ୍ୱାରା ଛାତ୍ରଛାତ୍ରୀମାନେ ଜଟିଳ ବୈଶ୍ୱିକ ଆହ୍ୱାନର ମୁକାବିଲା କରିବା ପାଇଁ ପ୍ରସ୍ତୁତ ହୋଇ ପାରୁଛନ୍ତି ବୋଲି ରାଜ୍ୟପାଳ କହିଥିଲେ ।
ରାଜ୍ୟପାଳ କହିଛନ୍ତି ଯେ, ରାଜ୍ୟ ଏହାର ଶିକ୍ଷାଗତ ଭିତ୍ତିଭୂମିକୁ ବିସ୍ତାର କରୁଛି, ବିଶ୍ୱବିଦ୍ୟାଳୟଗୁଡ଼ିକୁ ସୁଦୃଢ଼ କରୁଛି ଏବଂ ଦକ୍ଷ ମାନବ ସମ୍ବଳକୁ ପୋଷଣ କରିବା ପାଇଁ ଏକ ପରିବେଶ ପ୍ରଣାଳୀ ନିର୍ମାଣ କରୁଛି । ଓଡ଼ିଶା ଆଧୁନିକ ମହତ ଆକାଂକ୍ଷା ଏବଂ କାଳଜୟୀ ଐତିହ୍ୟର ଅନନ୍ୟ ମିଶ୍ରଣ । ଏହାର ମନ୍ଦିର ଏବଂ ପର୍ବପର୍ବାଣୀ ଓ ପ୍ରାକୃତିକ ସମ୍ପଦ ଉପରେ ଆଲୋକପାତ କରି ରାଜ୍ୟପାଳ କହିଥିଲେ ଯେ ଏହା ପର୍ଯ୍ୟଟନ, ଶିଳ୍ପ ଏବଂ ନବସୃଜନ ପାଇଁ ସୁଯୋଗ ପ୍ରଦାନ କରୁଛି । ଭାରତ ସରକାରଙ୍କ ଏଆଇସିଟିଇର ଅଧ୍ୟକ୍ଷ ପ୍ରଫେସର ଟି.ଜି. ସୀତାରାମ ଏବଂ ଏଆଇଏମ୍ଏସ୍ ବାର୍ଷିକ ସମ୍ମିଳନୀ ୨୦୨୫ ର ସମ୍ମିଳନୀ ନିର୍ଦ୍ଦେଶକ ଇଂ ସରୋଜ କୁମାର ସାହୁ ଏହି ଅବସରରେ ବକ୍ତବ୍ୟ ପ୍ରଦାନ କରିଥିଲେ । ଏଆଇଏମ୍ଏସ୍ ଭୁବନେଶ୍ୱରର ଅଧ୍ୟକ୍ଷ ଡକ୍ଟର ରମାକାନ୍ତ ପାତ୍ର ସ୍ୱାଗତ ଭାଷଣ ଦେଇଥିବା ବେଳେ ସୋଆ ବିଶ୍ୱବିଦ୍ୟାଳୟର ପ୍ରୋ- ଭାଇସ ଚ୍ୟାନସେଲର ପ୍ରଫେସର ଅନୁପ କୁମାର ସାମନ୍ତରାୟ ଧନ୍ୟବାଦ ଦେଇଥିଲେ ।
