Odisha News: ଭୁବନେଶ୍ୱର (ରିପୋଟର୍ସ ପେନ୍) : ଛାତ୍ରୀଙ୍କ ସୁରକ୍ଷା ପାଇଁ ଉଚ୍ଚ ଶିକ୍ଷାନୁଷ୍ଠାନରେ ‘ଶକ୍ତିଶ୍ରୀ’ ସଂଯୋଜିକା ରଖିବା ନେଇ ବିଶ୍ବବିଦ୍ୟାଳୟ ରେଜିଷ୍ଟ୍ରାର ଓ କଲେଜ ପ୍ରିନ୍ସିପାଲଙ୍କୁ ଉଚ୍ଚଶିକ୍ଷା ବିଭାଗ ପକ୍ଷରୁ ଚିଠି ହୋଇଛି । ବାଲେଶ୍ବର FM ଘଟଣା ପରେ ଉଚ୍ଚ ଶିକ୍ଷା ବିଭାଗ ପକ୍ଷରୁ ବଡ଼ ପଦକ୍ଷେପ ଗ୍ରହଣ କରାଯାଇଛି । ଜଣେ ଅଧ୍ୟାପିକାଙ୍କୁ ଶକ୍ତିଶ୍ରୀ ସଂଯୋଜିକା ଭାବେ ମନୋନୀତ କରିବାକୁ ନିର୍ଦ୍ଦେଶ ଦିଆଯାଇଛି । ଅଗଷ୍ଟ ୪ ସୁଦ୍ଧା ‘ଶକ୍ତିଶ୍ରୀ’ ସଂଯୋଜିକା ମନୋନୀତ କରି ଦାୟିତ୍ବ ଦେବାକୁ ନିର୍ଦ୍ଦେଶ ରହିଛି । ଛାତ୍ରୀଙ୍କୁ ସଶକ୍ତୀକରଣ ଓ ସେମାନଙ୍କ ସୁରକ୍ଷା ପାଇଁ ଏପରି ପଦକ୍ଷେପ ଗ୍ରହଣ କରାଯାଇଛି।
ଆଜି ସମସ୍ତ ଜିଲ୍ଲାର ଜିଲ୍ଲାପାଳମାନଙ୍କୁ ଓଡ଼ିଶା ସରକାରଙ୍କ ଦ୍ୱାରା ଏକ ଚିଠି ଜାରି କରାଯାଇଛି । ଯେଉଁଥିରେ, ପ୍ରତି ଜିଲ୍ଲାରେ ପାଞ୍ଚ ଜଣ ବିଶିଷ୍ଟ ମହିଳା ବୃତ୍ତିଗତଙ୍କୁ ଚିହ୍ନଟ କରିବାକୁ ପ୍ରସ୍ତାବ ଦିଆଯାଇଛି । ଉକ୍ତ ଚିହ୍ନଟ ମହିଳାଙ୍କୁ “ଶକ୍ତି ଆପା” ଭାବରେ ନାମିତ କରାଯିବ। ଏହି ପରାମର୍ଶଦାତାମାନେ ଜିଲ୍ଲାର ଶିକ୍ଷାନୁଷ୍ଠାନଗୁଡ଼ିକରେ ଯୁବ ଛାତ୍ରୀମାନଙ୍କୁ ମାର୍ଗଦର୍ଶନ ଏବଂ ପ୍ରେରଣା ଦେବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବେ। ପ୍ରତ୍ୟେକ ଶକ୍ତି ଆପାଙ୍କୁ ସମ୍ପୃକ୍ତ ଜିଲ୍ଲା କଲେକ୍ଟରଙ୍କ ଦ୍ୱାରା ଚୟନ କରାଯିବ । ଶକ୍ତି ଅପା ପ୍ରତି ତିନି ମାସରେ ଥରେ ଛାତ୍ରଛାତ୍ରୀମାନଙ୍କ ସହିତ ପାରସ୍ପରିକ କ୍ରିୟା ଏବଂ ପରାମର୍ଶ ଦେବା ପାଇଁ ନିର୍ଦ୍ଦିଷ୍ଟ ପ୍ରତିଷ୍ଠାନଗୁଡ଼ିକୁ ପରିଦର୍ଶନ କରିବେ। ଶକ୍ତି ଅପାଙ୍କୁ ଉଚ୍ଚ ଶିକ୍ଷା ପ୍ରତିଷ୍ଠାନ (HELs) ପରିଦର୍ଶନ ପାଇଁ ଯାତ୍ରା ଏବଂ ଦୈନିକ ଭତ୍ତା (TA/DA) ସମ୍ପୃକ୍ତ HELs ଦ୍ୱାରା ବହନ କରାଯିବ।
ଯେଉଁ ମହିଳା ସୁରକ୍ଷା ଏବଂ ଶିଶୁ ସୁରକ୍ଷା କ୍ଷେତ୍ରରେ କାର୍ଯ୍ୟରତ ମହିଳା ସାମାଜିକ କର୍ମୀ କିମ୍ୱା ଅବସରପ୍ରାପ୍ତ ମହିଳା ସରକାରୀ କର୍ମଚାରୀ ତଥା ପୋଲିସ ଏବଂ ସଶସ୍ତ୍ର ବାହିନୀରେ କାମ କରିଥିବେ, ଅଥବା ଆଇନ ଏବଂ ସାଇବର ସୁରକ୍ଷା ବିଶେଷଜ୍ଞ ଜଣେ ଯୋଗ୍ୟ ବୃତ୍ତିଗତ ଯିଏକି ଆଇନ, ଆଇନଗତ ଅଧିକାର ଏବଂ ଡିଜିଟାଲ୍ ସୁରକ୍ଷାରେ ବିଶେଷଜ୍ଞ। ଏଥିସହ ମହିଳା ସ୍ୱାସ୍ଥ୍ୟ ଏବଂ ମାନସିକ ସାମାଜିକ ପ୍ରସଙ୍ଗରେ ବିଶେଷଜ୍ଞତା ସହିତ ଜନସ୍ୱାସ୍ଥ୍ୟ ବିଶେଷଜ୍ଞ/ମନୋବିଜ୍ଞାନୀ ପରାମର୍ଶଦାତା ହୋଇଥିଲେ, ନଚେତ୍ ଶିକ୍ଷା ବିଶେଷଜ୍ଞ, ଯେପରିକି ବିଶ୍ୱବିଦ୍ୟାଳୟ ଛାତ୍ର କଲ୍ୟାଣ କମିଟିର ସଂଯୋଜକ କିମ୍ବା ଏକ ପ୍ରତିଷ୍ଠିତ ଅନୁଷ୍ଠାନର ଅଧ୍ୟକ୍ଷ ରହିଥିବେ । ତେବେ କାହାକୁ ଚୟନ କରାଯିବ ସେ ନିଷ୍ପତ୍ତି ଜିଲ୍ଲାପାଳ ଗ୍ରହଣ କରିବେ ।
ଜିଲ୍ଲାପାଳଙ୍କୁ ନିର୍ଦ୍ଦେଷ ଦିଆଯାଇଛି ଯେ, ସଂକ୍ଷିପ୍ତ ପ୍ରୋଫାଇଲ୍ ଏବଂ ଯୋଗାଯୋଗ ବିବରଣୀ ସହିତ ଶକ୍ତି ଆପାଙ୍କ ଚୂଡ଼ାନ୍ତ ତାଲିକା ୨୦ ଦିନ ମଧ୍ୟରେ ଅର୍ଥାତ୍ ୨୦ ଅଗଷ୍ଟ ୨୦୨୫ ରେ କିମ୍ବା ତା ପୂର୍ବରୁ ଦାଖଲ କରିବା ଆବଶ୍ୟକ।
