bargarh minor girl burn: ବରଗଡ଼ (ରିପୋଟର୍ସପେନ୍) : ପୁଣି ପେଟ୍ରୋଲ ନିଆଁରେ ଜଳିଗଲେ ଆଉ ଜଣେ ଛାତ୍ରୀ । ବରଗଡ଼ ଜିଲ୍ଲା ଗାଇସିଲେଟ ଥାନା ଅଂଚଳର ଅଷ୍ଟମ ଶ୍ରେଣୀରେ ପଢ଼ୁଥିବା ଜଣେ ୧୩ ବର୍ଷିୟା ନାବାଳିକା ନିଆଁରେ ପୋଡି ମୃତ୍ୟୁ ବରଣ କରିଛନ୍ତି । ମୃତ୍ୟୁର କାରଣ ଅସ୍ପଷ୍ଟ ଥିବା ବେଳେ ପୋଲିସ ଘଟଣାର ତଦନ୍ତ ଆରମ୍ଭ କରିଛି ।
ପ୍ରତ୍ୟକ୍ଷଦର୍ଶୀଙ୍କ କହିବାନୁସାରେ, ଆଜି ସକାଳେ ଗାଁ ପାଖ ଏକ ଖେଳ ପଡିଆ ନିକଟରେ ଝିଅଟି ଜଳିଯାଉଥିବାର ଲୋକେ ଦେଖିଥିଲେ । ସେମାନେ ପାଟି କରିବାରୁ ଲୋକେ ଦୌଡି ଯାଇ ନିଆଁ ଲିଭାଇବା ସହ ତାକୁ ଉଦ୍ଧାର କରିଥିଲେ । କାହିଁକି ଏପରି କଲେ ବୋଲି ପଚାରିବାରୁ ନାବାଳିକା ଜଣକ ଅନ୍ୟ ଗୋଟିଏ ଝିଅ ପାଇଁ ଏପରି କରିଥିବା କହିଥିଲା ।” ପରେ ତାଙ୍କୁ ତୁରନ୍ତ ହସପିଟାଲକୁ ପଠାଇଦିଆଯାଇଥିଲା । ତାଙ୍କ ଶରୀରର ଅଧିକାଂଶ ଅଂଶ ଜଳିଯାଇଥିଲା । ଛାତ୍ରୀଙ୍କ ଅବସ୍ଥା ଗୁରୁତର ଥିବା ବେଳେ, ତାଙ୍କୁ ସମ୍ବଲପୁର ଭୀମସାର ହସ୍ପିଟାଲରେ ଭର୍ତ୍ତିି କରାଯାଇଥିଲା । ଚିକିତ୍ସାଧିନ ଅବସ୍ଥାରେ ତାଙ୍କର ମୃତ୍ୟୁ ଘଟିଥିଲା ।
ଖବରପାଇ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ଏକ ସ୍ୱତନ୍ତ୍ର ଟିମ ଗଠନ କରାଯାଇ ତଦନ୍ତକୁ ତ୍ୱରାନ୍ୱିତ କରାଯାଇଛି । ଏପରି କି ଉତ୍ତରାଂଚଳ ଆଇଜି ହିଂମାଶୁ ଲାଲ ଓ ବରଗଡ଼ ଜିଲ୍ଲା ଦାୟିତ୍ୱରେ ଥିବା ବଲାଙ୍ଗୀର ଏସପି ଅଭିଳାଷ ଜି ହସ୍ପିଟାଲରେ ପହଂଚି ସ୍ଥିତି ତଦାରଖ କରିଥିଲେ ।
ମୃତ ନାବାଳିକାର ପରିବାର ଲୋକେ କହିଛନ୍ତି, ଛାତ୍ରୀ ଜଣଙ୍କ ତାଙ୍କ ମାମୁଁ ଘରରେ ରହି ପାଠ ପଢ଼ୁଥିଲେ । ଆଜି ସକାଳୁ ମାମୁଁ ଘର ନିକଟରେ ଥିବା ଏକ ଖେଳ ପଡ଼ିଆରୁ ତାଙ୍କୁ ଅର୍ଦ୍ଧ୍ଧଦଗ୍ଧ ଅବସ୍ଥାରେ ଉଦ୍ଧାର କରାଯାଇଥିଲା । ନାବାଳିକା ଶରୀରେ ନିଆଁ ଲାଗିଯାଇଥିବା ପ୍ରାଥମିକ ଭାବେ ସୂଚନା ମିଳିଛି । ସ୍ଥାନୀୟ ଲୋକେ ନାବାଳିକାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରିଥିଲେ । ପରେ ପୋଲିସ ସହାୟତାରେ ଏକ ଆମ୍ବୁଲାନ୍ସ ଯୋଗେ ପୀଡ଼ିତାଙ୍କୁ ହସପିଟାଲ ନିଆଯାଇଥିଲା । କାରଣ କ’ଣ ତାହା ଜଣାପଡିନାହିଁ । ତଦନ୍ତ ହେଲେ ସବୁ ସ୍ପଷ୍ଟ ହେବ ।
ନାବାଳିକାର ମାମୁଁ କହିଛନ୍ତି, “କୌଣସି କାରଣ ବଶତଃ ଆମ ଭାଣେଜୀ ଜଳି ଯାଇଛି । ଭାଣିଜୀକୁ ଜଳିଯାଇଥିବା ଅବସ୍ଥାରେ ପାଇବା ପରେ ଆମେ ଆମ୍ବୁଲାନ୍ସକୁ ଫୋନ କରିଥିଲୁ । ହେଲେ ଆମ୍ବୁଲାନ୍ସ ଆସିବାରେ ବହୁତ ବିଳମ୍ବ ହେଲା । ” ତେବେ କିଛି ଦିନ ତଳେ ଝିଅର ସ୍ୱାସ୍ଥ୍ୟ ଅବସ୍ଥା ବିଗିଡ଼ିବାରୁ ତାଙ୍କୁ ସ୍କୁଲର ଶିକ୍ଷକମାନେ ନିଜଗାଁକୁ ଆଣି ଛାଡ଼ିଦେଇ ଯାଇଥିଲେ । ସୁସ୍ଥ ହେବା ପରେ ଆଜି ହିଁ ନାବାଳିକା ଜଣକ ସ୍କୁଲକୁ ଯିବାର ଥିଲା । ହେଲେ ଏଭଳି ଘଟଣା ଆମକୁ ମର୍ମାହତ କରିଛି ।
ଉଲ୍ଲେଖଥାକୁ କି, ଗତ କିଛିଦିନ ପୂର୍ବରୁ ବାଲେଶ୍ୱର, ବଳଙ୍ଗା ଏବଂ କେନ୍ଦ୍ରାପଡ଼ା ପଟାମୁଣ୍ଡାଇରେ ଆତ୍ମାହୁତି ଜନିତ ମୃତ୍ୟୁ ଘଟଣା, ଏବେ ମଧ୍ୟ ମନରୁ ଲିଭି ନଥିବା ବେଳେ, ବରଗଡ଼ ଜିଲ୍ଲାରେ ଏକ ଲୋମ ଟାଙ୍କୁରା ଅଘଟଣ ସାମ୍ନାକୁ ଆସିଛି । କେଉଁ ପରିସ୍ଥିତିରେ ଏଭଳି ଦୁର୍ଭାଗ୍ୟଜନ ଘଟଣା ଘଟିଛି, ତାହା ସ୍ପଷ୍ଟ ହୋଇନାହିଁ ।
