PM Modi Inaugurates Chenab Bridge: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶୁକ୍ରବାର ଦିନ ଚେନାବ ରେଳ ସେତୁର ଉଦଘାଟନ କରିଛନ୍ତି। ଏହା ପୂର୍ବରୁ ସେ ବିଶ୍ୱର ସର୍ବୋଚ୍ଚ ରେଳ ସେତୁର ପରିଦର୍ଶନ କରିଥିଲେ। ଏହି ସେତୁ ଜମ୍ମୁ ଓ କାଶ୍ମୀରର ରିଆସି ଜିଲ୍ଲାରେ ଚେନାବ ନଦୀ ଉପରେ ନିର୍ମିତ ହୋଇଛି। ଏହା ପରେ ପ୍ରଧାନମନ୍ତ୍ରୀ ମୋଦି ଅଞ୍ଜୀ ସେତୁର ମଧ୍ୟ ଉଦଘାଟନ କରିଥିଲେ। ଅଞ୍ଜୀ ସେତୁ ହେଉଛି ଭାରତର ପ୍ରଥମ କେବୁଲ ରେଳ ସେତୁ। ଏହା ପରେ ପ୍ରଧାନମନ୍ତ୍ରୀ ମୋଦି କଟରା-ଶ୍ରୀନଗର ବନ୍ଦେ ଭାରତ ଏକ୍ସପ୍ରେସକୁ ପତାକା ଦେଖାଇ ଶୁଭାରମ୍ଭ କରିଥିଲେ। ଯାହା ଘାଟିକୁ ଭାରତର ଅନ୍ୟାନ୍ୟ ଅଂଶ ସହିତ ସଂଯୋଗ କରୁଥିବା ପ୍ରଥମ ଟ୍ରେନ। ପ୍ରଧାନମନ୍ତ୍ରୀ କଟରା ରେଳ ଷ୍ଟେସନରେ କଟରା-ଶ୍ରୀନଗର ବନ୍ଦେ ଭାରତ ଟ୍ରେନକୁ ପତାକା ଦେଖାଇ ଶୁଭାରମ୍ଭ କରିବା ପୂର୍ବରୁ ଟ୍ରେନର ଯାତ୍ରୀ ଏବଂ କ୍ରୁ ସଦସ୍ୟଙ୍କ ସହିତ ଆଲୋଚନା ମଧ୍ୟ କରିଥିଲେ।
ପୂର୍ବରୁ ପ୍ରଧାନମନ୍ତ୍ରୀ ମୋଦି ଚେନାବ ନଦୀ ଉପରେ ଥିବା ବିଶ୍ୱର ସର୍ବୋଚ୍ଚ ରେଳ ସେତୁ ନିକଟରେ ‘ଭ୍ୟୁ ପଏଣ୍ଟ’ରେ ପହଞ୍ଚିଥିଲେ ଏବଂ କାଶ୍ମୀରକୁ ଦେଶର ଅନ୍ୟାନ୍ୟ ଅଂଶ ସହିତ ରେଳ ସଂଯୋଗ କରିବା ପାଇଁ ଗୁରୁତ୍ୱପୂର୍ଣ୍ଣ ପ୍ରକଳ୍ପ ବିଷୟରେ ସୂଚନା ଦେଇଥିଲେ। ପ୍ରଧାନମନ୍ତ୍ରୀ, କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବ, ଜିତେନ୍ଦ୍ର ସିଂହ ଏବଂ ମୁଖ୍ୟମନ୍ତ୍ରୀ ଓମାର ଅବଦୁଲ୍ଲାଙ୍କ ସହିତ, ପ୍ରତୀକାତ୍ମକ ସେତୁ ନିକଟରେ ସ୍ଥାପିତ ରେଳ ସଂଗ୍ରହାଳୟ ପରିଦର୍ଶନ କରିଥିଲେ। ପ୍ରଧାନମନ୍ତ୍ରୀ ‘ଭ୍ୟୁ ପଏଣ୍ଟ’ ଉପରକୁ ଯାଇ ନଦୀଠାରୁ ୩୫୯ ମିଟର ଉଚ୍ଚତାରେ ଅବସ୍ଥିତ ଇଞ୍ଜିନିୟରିଂର ଏକ ମାଷ୍ଟରପିସ୍ ଚେନାବ ସେତୁ ବିଷୟରେ ସୂଚନା ପାଇଥିଲେ। ଏହି ସେତୁ ପ୍ୟାରିସର ଆଇଫେଲ୍ ଟାୱାରଠାରୁ ୩୫ ମିଟର ଉଚ୍ଚ।
ପ୍ରଧାନମନ୍ତ୍ରୀଙ୍କୁ ସଂଗ୍ରହାଳୟରେ ଇଞ୍ଜିନିୟର ଏବଂ ଶ୍ରମିକଙ୍କ ସହ ଭାବ ବିନିମୟ କରୁଥିବାର ମଧ୍ୟ ଦେଖାଯାଇଥିଲା। ସଂଗ୍ରହାଳୟଟି ରିଆସି ଜିଲ୍ଲାରେ ଚେନାବ ନଦୀ ଉପରେ ବିଶ୍ୱର ସବୁଠାରୁ ଉଚ୍ଚତମ ଆର୍କ ରେଳ ସେତୁର ଏକ ଅଂଶ। ଏହା ପରେ ପ୍ରଧାନମନ୍ତ୍ରୀ ମୋଦି ଚେନାବ ରେଳ ସେତୁ ଏବଂ ଅଞ୍ଜି ନଦୀ ଉପରେ ଭାରତର ପ୍ରଥମ ‘କେବଲ-ଷ୍ଟେଡ୍’ ରେଳ ସେତୁର ଉଦଘାଟନ କରିଥିଲେ।
ପ୍ରଧାନମନ୍ତ୍ରୀଙ୍କ ଉଦଘାଟନ ସହିତ ଦୁଇଟି ବନ୍ଦେ ଭାରତ ଟ୍ରେନର ବାଣିଜ୍ୟିକ ଯାତ୍ରା ଶନିବାର ଜୁନ୍ ୭ ତାରିଖରୁ ଆରମ୍ଭ ହେବ। ଶ୍ରୀନଗର ଏବଂ ଶ୍ରୀ ବୈଷ୍ଣୋ ଦେବୀ କଟରା ମଧ୍ୟରେ ସମସ୍ତ ଶୁଳ୍କ ସହିତ ଚେୟାର କାର ଶ୍ରେଣୀରେ ଭଡା ୭୧୫ ଟଙ୍କା ଏବଂ ଏକଜିକ୍ୟୁଟିଭ୍ ଶ୍ରେଣୀରେ ୧୩୨୦ ଟଙ୍କା ସ୍ଥିର କରାଯାଇଛି। ଏହି ଦୁଇଟି ଟ୍ରେନ ଚାଲିବା ଦ୍ୱାରା ଦେଶର ବିଭିନ୍ନ ସ୍ଥାନରୁ କଟରା ଆସୁଥିବା ପର୍ଯ୍ୟଟକ ଏବଂ ରେଳ ଯାତ୍ରୀମାନେ କାଶ୍ମୀରରେ ପହଞ୍ଚିବା ସହଜ ହେବ। ସେମାନଙ୍କର ସାତ ଘଣ୍ଟାର ସଡ଼କ ଯାତ୍ରା ଏବେ ତିନି ଘଣ୍ଟାରେ ସମାପ୍ତ ହେବ।
