୩ଟି ମ୍ୟାଚ୍ରେ ମାତ୍ର ଗୋଟିଏ ୱିକେଟ୍, ଇକୋନୋମି ରେଟ୍ ୧୦ରୁ ଅଧିକ; ଯୁବ ବୋଲରଙ୍କୁ ସୁଯୋଗ ମିଳିବା ନେଇ ଚର୍ଚ୍ଚା
ଭୁବନେଶ୍ୱର, : ଦୀର୍ଘ ଚାରି ବର୍ଷ ପରେ ଭାରତୀୟ ଟି-୨୦ ଦଳକୁ ଫେରିଥିବା ଅଭିଜ୍ଞ ଦ୍ରୁତ ବୋଲର ଭୁବନେଶ୍ୱର କୁମାରଙ୍କ ପାଇଁ ନ୍ୟୁଜିଲାଣ୍ଡ ବିପକ୍ଷ ସିରିଜ୍ ଏ ପର୍ଯ୍ୟନ୍ତ ନିରାଶାଜନକ ରହିଛି। ଆଇପିଏଲ୍ ଓ ଘରୋଇ କ୍ରିକେଟ୍ରେ ଚମତ୍କାର ପ୍ରଦର୍ଶନ ପରେ ଜାତୀୟ ଦଳକୁ ଫେରିଥିବା ଭୁବିଙ୍କ ଉପରେ ସମସ୍ତଙ୍କ ନଜର ରହିଥିଲା। ଏହି ସିରିଜ୍ରେ ଭଲ ପ୍ରଦର୍ଶନ କରି ସେ ୨୦୨୭ ବିଶ୍ୱକପ୍ ପାଇଁ ମଧ୍ୟ ନିଜର ଦାବି ଉପସ୍ଥାପନ କରିପାରିଥାନ୍ତେ। କିନ୍ତୁ ପ୍ରାରମ୍ଭିକ ତିନିଟି ମ୍ୟାଚ୍ର ପ୍ରଦର୍ଶନ ତାଙ୍କ ପାଇଁ ଚିନ୍ତା ବଢ଼ାଇଛି।
ଭାରତର ପୂର୍ବତନ କ୍ରିକେଟର ତଥା ଭାଷ୍ୟକାର ଆକାଶ ଚୋପ୍ରା ଭୁବନେଶ୍ୱରଙ୍କ ପ୍ରଦର୍ଶନକୁ ନେଇ ମତ ରଖିଛନ୍ତି। ତାଙ୍କ ମତରେ, ନ୍ୟୁଜିଲାଣ୍ଡ ବିପକ୍ଷ ଏହି ପ୍ରତ୍ୟାବର୍ତ୍ତନ ସିରିଜ୍ ଭୁବନେଶ୍ୱରଙ୍କ ପାଇଁ ଶେଷ ସୁଯୋଗ ମଧ୍ୟ ହୋଇପାରେ।
୩ଟି ମ୍ୟାଚ୍ରେ ଗୋଟିଏ ୱିକେଟ୍
ନ୍ୟୁଜିଲାଣ୍ଡ ବିପକ୍ଷ ପ୍ରଥମ ତିନିଟି ଟି-୨୦ ମ୍ୟାଚ୍ରେ ଭୁବନେଶ୍ୱର ମାତ୍ର ଗୋଟିଏ ୱିକେଟ୍ ନେଇପାରିଛନ୍ତି। ଏହି ତିନୋଟି ମ୍ୟାଚ୍ରେ ସେ ପ୍ରତି ଓଭରରେ ୧୦ରୁ ଅଧିକ ରନ୍ ବ୍ୟୟ କରିଛନ୍ତି। ପ୍ରଥମ ମ୍ୟାଚ୍ରେ ୪୯, ଦ୍ୱିତୀୟ ମ୍ୟାଚ୍ରେ ୫୦ ଏବଂ ତୃତୀୟ ମ୍ୟାଚ୍ରେ ୪୦ ରନ୍ ଦେଇଥିଲେ। ତାଙ୍କଠାରୁ ଯେଉଁ ପ୍ରଦର୍ଶନ ଆଶା କରାଯାଉଥିଲା, ତାହା ଏଯାଏଁ ଦେଖିବାକୁ ମିଳିନାହିଁ।
ଭୁବିଙ୍କ ବୋଲିଂକୁ ନେଇ କ’ଣ କହିଲେ ଆକାଶ ଚୋପ୍ରା?
ନିଜ ୟୁଟ୍ୟୁବ୍ ଚ୍ୟାନେଲ୍ରେ ଭୁବନେଶ୍ୱରଙ୍କ ପ୍ରଦର୍ଶନ ବିଷୟରେ ଆଲୋଚନା କରି ଆକାଶ ଚୋପ୍ରା କହିଛନ୍ତି ଯେ, ଟି-୨୦ ସିରିଜ୍କୁ ଭୁବନେଶ୍ୱରଙ୍କ ପ୍ରତ୍ୟାବର୍ତ୍ତନର ଆରମ୍ଭ ଭାବେ ଦେଖାଯାଉଥିଲା। ଏହା ମାଧ୍ୟମରେ ସେ ୨୦୨୭ ବିଶ୍ୱକପ୍ ପାଇଁ ନିଜକୁ ପ୍ରସ୍ତୁତ କରିବେ ବୋଲି ଆଶା କରାଯାଉଥିଲା। କିନ୍ତୁ ପ୍ରଥମ ତିନିଟି ମ୍ୟାଚ୍ର ପ୍ରଦର୍ଶନ ସନ୍ତୋଷଜନକ ନୁହେଁ। ସେ ଲଗାତାର ଅଧିକ ରନ୍ ବ୍ୟୟ କରୁଛନ୍ତି।
ଭୁବନେଶ୍ୱରଙ୍କ ବୋଲିଂର ଦୁର୍ବଳତା ବିଷୟରେ ଚୋପ୍ରା କହିଛନ୍ତି ଯେ, ତାଙ୍କର ବଲ୍ର ଲେନ୍ଥ ଅଧିକ ଛୋଟ ରହୁଛି ଏବଂ ବୋଲିଂର ଗତି ମଧ୍ୟ କମ୍ ରହିଛି। ତାଙ୍କର ସର୍ବାଧିକ ବେଗ ପ୍ରାୟ ୧୩୨ କିମି ପ୍ରତି ଘଣ୍ଟା ରହୁଛି। ଏହା ଦେଖି ସେ ଅନ୍ତର୍ଜାତୀୟ କ୍ରିକେଟ୍ ପାଇଁ ଏଯାଏଁ ପୂରା ପ୍ରସ୍ତୁତ ନଥିବା ଭଳି ମନେ ହେଉଛି ବୋଲି ଚୋପ୍ରା ମତ ଦେଇଛନ୍ତି।
ଏହା ସହିତ, ଅଧିନାୟକ ଶ୍ରେୟସ ଆୟର ତାଙ୍କୁ ଯେଉଁଭଳି ଭାବେ ବ୍ୟବହାର କରୁଛନ୍ତି, ସେଥିରେ ମଧ୍ୟ ଚୋପ୍ରା ପ୍ରଶ୍ନ ଉଠାଇଛନ୍ତି। ତାଙ୍କ ଅନୁସାରେ, ଭୁବନେଶ୍ୱରଙ୍କ ଓଭରଗୁଡ଼ିକୁ ୧୬ତମ ଓଭର ସୁଦ୍ଧା ଶେଷ କରାଯାଉଛି। ତେବେ ତାଙ୍କଠାରୁ ଆଶା କରାଯାଇଥିବା ପ୍ରଦର୍ଶନ ଏଯାଏଁ ମିଳିନାହିଁ।
ଶେଷ ସିରିଜ୍ ହୋଇପାରେ!
ଭୁବନେଶ୍ୱରଙ୍କ ପାଇଁ ଆଗାମୀ ଦୁଇଟି ମ୍ୟାଚ୍ ଗୁରୁତ୍ୱପୂର୍ଣ୍ଣ ବୋଲି ଆକାଶ ଚୋପ୍ରା କହିଛନ୍ତି। ଯଦି ଏହି ମ୍ୟାଚ୍ଗୁଡ଼ିକରେ ସେ ନିଜର ଦକ୍ଷତା ପ୍ରମାଣ କରିବାରେ ବିଫଳ ହୁଅନ୍ତି, ତେବେ ତାଙ୍କ ପ୍ରତ୍ୟାବର୍ତ୍ତନ ସିରିଜ୍ ହିଁ ଶେଷ ସିରିଜ୍ ହୋଇପାରେ ବୋଲି ଚୋପ୍ରା ଆଶଙ୍କା ପ୍ରକାଶ କରିଛନ୍ତି।
ତାଙ୍କ କହିବା ଅନୁସାରେ, ଜଣେ ଖେଳାଳିଙ୍କୁ ପ୍ରତ୍ୟାବର୍ତ୍ତନ ପାଇଁ ସୁଯୋଗ ଦିଆଯାଏ। କିନ୍ତୁ ସେହି ସୁଯୋଗରେ ନିଜର ସ୍ଥାନ ଦୃଢ଼ କରିପାରି ନଥିଲେ ଦଳ ଯୁବ ବୋଲରଙ୍କ ଆଡ଼କୁ ମୁହାଁଇଥାଏ। ତେଣୁ ଭୁବନେଶ୍ୱରଙ୍କ ପାଇଁ ଅବଶିଷ୍ଟ ଦୁଇଟି ମ୍ୟାଚ୍ ନିଜର ଅନ୍ତର୍ଜାତୀୟ କ୍ୟାରିୟରକୁ ଆଗକୁ ବଢ଼ାଇବା ଦିଗରେ ନିର୍ଣ୍ଣାୟକ ହୋଇପାରେ।
