ନୂଆଦିଲ୍ଲୀ, : ପିଲାଙ୍କ ପ୍ରତି ମାତାପିତାଙ୍କ ଭଲପାଇବା ଓ ଯତ୍ନ ସ୍ୱାଭାବିକ। କିନ୍ତୁ ଏହି ଭଲପାଇବା ଯେତେବେଳେ ଅତ୍ୟଧିକ ନିୟନ୍ତ୍ରଣର ରୂପ ନିଏ, ସେତେବେଳେ ଏହା ପିଲାଙ୍କ ମାନସିକ ବିକାଶ ଓ ଆତ୍ମବିଶ୍ୱାସ ଉପରେ ନକାରାତ୍ମକ ପ୍ରଭାବ ପକାଇପାରେ। ଆଜିକାଲି ପ୍ୟାରେଣ୍ଟିଂ ବା ପିଲାଙ୍କୁ ଲାଳନପାଳନ କରିବାର ବିଭିନ୍ନ ଶୈଳୀ ମଧ୍ୟରେ ‘ହେଲିକପ୍ଟର ପ୍ୟାରେଣ୍ଟିଂ’ ବେଶ୍ ଚର୍ଚ୍ଚାରେ ରହିଛି। ଏହି ଶୈଳୀରେ ମାତାପିତା ପିଲାଙ୍କ ଜୀବନର ପ୍ରତ୍ୟେକ ଛୋଟବଡ଼ କାର୍ଯ୍ୟ ଉପରେ ନଜର ରଖିବା ସହ ସବୁ ନିଷ୍ପତ୍ତିରେ ହସ୍ତକ୍ଷେପ କରିଥାନ୍ତି।
କ’ଣ ଏହି ହେଲିକପ୍ଟର ପ୍ୟାରେଣ୍ଟିଂ?
ହେଲିକପ୍ଟର ଯେପରି ଆକାଶରେ ଉଡ଼ି ଗୋଟିଏ ସ୍ଥାନ ଉପରେ ଘୂରି ବୁଲେ, ସେହିପରି ଏହି ପ୍ୟାରେଣ୍ଟିଂ ଶୈଳୀରେ ମାତାପିତା ପିଲାଙ୍କ ପ୍ରତ୍ୟେକ କାର୍ଯ୍ୟ ଉପରେ ନଜର ରଖିଥାନ୍ତି। ପିଲା କ’ଣ କରୁଛି, କାହା ସହ ମିଶୁଛି, କେଉଁ ନିଷ୍ପତ୍ତି ନେଉଛି ଏବଂ କୌଣସି ସମସ୍ୟାର ସମ୍ମୁଖୀନ ହେଉଛି କି ନାହିଁ, ସବୁଥିରେ ମାତାପିତା ଅତ୍ୟଧିକ ହସ୍ତକ୍ଷେପ କରନ୍ତି।
ପିଲାଙ୍କୁ କୌଣସି ଅସୁବିଧା, ବିଫଳତା କିମ୍ବା ନିରାଶାରୁ ରକ୍ଷା କରିବା ଏହାର ମୁଖ୍ୟ ଉଦ୍ଦେଶ୍ୟ ହୋଇଥାଏ। ଯଦିଓ ଏହା ପଛରେ ମାତାପିତାଙ୍କ ଭଲପାଇବା ଓ ଚିନ୍ତା ରହିଥାଏ, ତଥାପି ଅତ୍ୟଧିକ ସୁରକ୍ଷା ପିଲାଙ୍କ ସ୍ୱାଧୀନ ଭାବେ ଚିନ୍ତା କରିବା ଓ ନିଷ୍ପତ୍ତି ନେବାର କ୍ଷମତାକୁ ପ୍ରଭାବିତ କରିପାରେ।
ପିଲାଙ୍କ ଉପରେ କ’ଣ ପ୍ରଭାବ ପଡ଼େ?
୧. ଆତ୍ମବିଶ୍ୱାସ କମିପାରେ: ପିଲାଙ୍କୁ ନିଜେ ନିଷ୍ପତ୍ତି ନେବାର ସୁଯୋଗ ନ ମିଳିଲେ ସେମାନେ ପ୍ରତ୍ୟେକ କାମ ପାଇଁ ମାତାପିତାଙ୍କ ଉପରେ ନିର୍ଭରଶୀଳ ହୋଇପଡ଼ନ୍ତି। ପରବର୍ତ୍ତୀ ସମୟରେ ନିଜେ କୌଣସି ନିଷ୍ପତ୍ତି ନେବାକୁ ପଡ଼ିଲେ ସେମାନେ ଦ୍ୱନ୍ଦ୍ୱରେ ପଡ଼ିପାରନ୍ତି ଏବଂ ନିଜ ନିଷ୍ପତ୍ତି ଉପରେ ଭରସା କରିବାରେ ଅସୁବିଧା ଅନୁଭବ କରନ୍ତି।
୨. ମାନସିକ ଚାପ ବଢ଼ିପାରେ: ମାତାପିତା ସବୁବେଳେ ନଜର ରଖୁଥିବାରୁ ପିଲାଙ୍କ ମନରେ ସବୁ କାମ ଠିକ୍ ଭାବେ କରିବାର ଚାପ ସୃଷ୍ଟି ହୋଇପାରେ। ମାତାପିତାଙ୍କ ଆଶା ପୂରଣ କରି ନ ପାରିବା କିମ୍ବା ସେମାନଙ୍କୁ ଅସନ୍ତୁଷ୍ଟ କରିଦେବାର ଭୟ ପିଲାଙ୍କ ମାନସିକ ଚାପ ବଢ଼ାଇପାରେ।
୩. ସମସ୍ୟାର ସମାଧାନ କରିବାରେ ଅସୁବିଧା: ପିଲାଙ୍କ ପ୍ରତ୍ୟେକ ସମସ୍ୟା ଯଦି ମାତାପିତା ନିଜେ ସମାଧାନ କରିଦିଅନ୍ତି, ତେବେ ପିଲାମାନେ ନିଜେ ସମସ୍ୟାର ମୁକାବିଲା କରିବାର ସୁଯୋଗ ପାଆନ୍ତି ନାହିଁ। ଫଳରେ ଭବିଷ୍ୟତରେ କଠିନ ପରିସ୍ଥିତିର ସାମ୍ନା କରିବା ଓ ସମାଧାନ ଖୋଜିବାରେ ସେମାନଙ୍କୁ ଅସୁବିଧା ହୋଇପାରେ।
କିପରି ରଖିବେ ସନ୍ତୁଳନ?
ପିଲାଙ୍କ ସୁରକ୍ଷା ଓ ଯତ୍ନ ନେବା ଯେତିକି ଜରୁରୀ, ସେମାନଙ୍କୁ ନିଜେ ଶିଖିବା ଓ ନିଷ୍ପତ୍ତି ନେବାର ସୁଯୋଗ ଦେବା ମଧ୍ୟ ସେତିକି ଆବଶ୍ୟକ। ତେଣୁ ମାତାପିତା ପିଲାଙ୍କ ପ୍ରତି ଯତ୍ନଶୀଳ ହେବା ସହ ସେମାନଙ୍କୁ ଉପଯୁକ୍ତ ସ୍ୱାଧୀନତା ଦେବା ଉଚିତ।
ବୟସ ଅନୁଯାୟୀ ଛୋଟଛୋଟ ନିଷ୍ପତ୍ତି ନିଜେ ନେବାକୁ ଦିଅନ୍ତୁ।
ଭୁଲ୍ କଲେ ତୁରନ୍ତ ଦୋଷ ନ ଦେଇ, ସେଥିରୁ ଶିଖିବାକୁ ସୁଯୋଗ ଦିଅନ୍ତୁ।
ପ୍ରତ୍ୟେକ ସମସ୍ୟାରେ ନିଜେ ହସ୍ତକ୍ଷେପ ନ କରି ପିଲାଙ୍କୁ ସମାଧାନ ଖୋଜିବାକୁ ଉତ୍ସାହିତ କରନ୍ତୁ।
ପିଲାଙ୍କ ମତାମତ ଶୁଣନ୍ତୁ ଏବଂ ସେମାନଙ୍କ ଉପରେ ଅଯଥା ଚାପ ପକାନ୍ତୁ ନାହିଁ।
ମନେ ରଖନ୍ତୁ, ପିଲାଙ୍କୁ ସବୁ ବିପଦରୁ ଦୂରେଇ ରଖିବା ଅପେକ୍ଷା ବିପଦକୁ ଚିହ୍ନିବା, ଭୁଲ୍ରୁ ଶିଖିବା ଓ ସମସ୍ୟାର ମୁକାବିଲା କରିବା ଶିଖାଇବା ଅଧିକ ଗୁରୁତ୍ୱପୂର୍ଣ୍ଣ। ମାତାପିତାଙ୍କ ସ୍ନେହ, ସମର୍ଥନ ଓ ଉପଯୁକ୍ତ ସ୍ୱାଧୀନତା ପିଲାଙ୍କୁ ଆତ୍ମନିର୍ଭରଶୀଳ ହେବା ସହ ଆତ୍ମବିଶ୍ୱାସୀ ହେବାରେ ସାହାଯ୍ୟ କରିପାରେ।
