ନୂଆଦିଲ୍ଲୀ: କିଡନୀ ଆମ ଶରୀରର ଏକ ଅତ୍ୟନ୍ତ ଜରୁରୀ ଅଙ୍ଗ। ଏହା ରକ୍ତରୁ କ୍ଷତିକାରକ ପଦାର୍ଥକୁ ଫିଲ୍ଟର କରି ଶରୀର ବାହାରକୁ ବାହାର କରିବା ସହ ଶରୀରକୁ ସୁସ୍ଥ ରଖିବାରେ ସହାୟକ ହୋଇଥାଏ। କିନ୍ତୁ ବଦଳୁଥିବା ଜୀବନଶୈଳୀ କାରଣରୁ କ୍ରୋନିକ କିଡନୀ ଡିଜିଜ୍ (CKD) ରୋଗୀଙ୍କ ସଂଖ୍ୟା ଦେଶରେ ଦ୍ରୁତ ଗତିରେ ବଢ଼ୁଛି। ବିଶେଷଜ୍ଞଙ୍କ କହିବା ଅନୁସାରେ, CKD ରୋଗୀମାନେ ଯଦି ସଠିକ୍ ସାବଧାନତା ଅବଲମ୍ବନ ନ କରନ୍ତି, ତେବେ ସେମାନଙ୍କଠାରେ ‘ଶିଙ୍ଗଲ୍ସ’ (Herpes Zoster) ସଂକ୍ରମଣର ଆଶଙ୍କା ଅନେକ ଗୁଣ ବଢ଼ିଯାଏ।
ଭାରତରେ ପ୍ରାୟ ୧୩.୨୪ ପ୍ରତିଶତ ଲୋକ କ୍ରୋନିକ କିଡନୀ ରୋଗରେ ପୀଡ଼ିତ। ଅର୍ଥାତ୍ ପ୍ରତି ୮ ଜଣରେ ଜଣେ CKD ସମସ୍ୟାରେ ଆକ୍ରାନ୍ତ। ଏହି ରୋଗରେ କିଡନୀ ଧୀରେ ଧୀରେ କ୍ଷତିଗ୍ରସ୍ତ ହେବା ସହ ରକ୍ତ ପରିଷ୍କାର କରିବାର କ୍ଷମତା କମିଯାଏ। ଏହାର ପ୍ରମୁଖ କାରଣ ହେଉଛି ଉଚ୍ଚ ରକ୍ତଚାପ ଏବଂ ମଧୁମେହ।
କିଡନୀର କାର୍ଯ୍ୟକ୍ଷମତା କମିଗଲେ ଶରୀରର ରୋଗ ପ୍ରତିରୋଧକ ଶକ୍ତି (ଇମ୍ୟୁନିଟି) ମଧ୍ୟ ଦୁର୍ବଳ ହୋଇପଡ଼େ। ଫଳରେ ବିଭିନ୍ନ ପ୍ରକାର ସଂକ୍ରମଣ ସହଜରେ ଶରୀରକୁ ଆକ୍ରମଣ କରିଥାଏ। ସେଥିମଧ୍ୟରୁ ଶିଙ୍ଗଲ୍ସ ଏକ ଗୁରୁତର ଭାଇରାଲ୍ ସଂକ୍ରମଣ। ଏହା ଭାରିସେଲା-ଜୋଷ୍ଟର ଭାଇରସ୍ (VZV) ପୁନର୍ବାର ସକ୍ରିୟ ହେବା ଫଳରେ ହୋଇଥାଏ। ଏହି ଭାଇରସ୍ ହିଁ ଚିକେନପକ୍ସର କାରଣ। ଚିକେନପକ୍ସ ଭଲ ହେବା ପରେ ମଧ୍ୟ ଭାଇରସ୍ ଶରୀରର ସ୍ନାୟୁରେ ନିଷ୍କ୍ରିୟ ଅବସ୍ଥାରେ ରହିଥାଏ। ଇମ୍ୟୁନିଟି ଦୁର୍ବଳ ହେଲେ ଏହା ପୁଣି ସକ୍ରିୟ ହୋଇ ଶିଙ୍ଗଲ୍ସ ସୃଷ୍ଟି କରେ।
ଶିଙ୍ଗଲ୍ସର ପ୍ରମୁଖ ଲକ୍ଷଣ ହେଉଛି ଶରୀରରେ ଲାଲ୍ ରାସ୍, ଯନ୍ତ୍ରଣାଦାୟକ ଫୋକା ଏବଂ ତୀବ୍ର ଜ୍ୱଳନ। ଅନେକ କ୍ଷେତ୍ରରେ ରାସ୍ ଭଲ ହୋଇଯିବା ପରେ ମଧ୍ୟ ଦୀର୍ଘ ସମୟ ଧରି ଅସହ୍ୟ ସ୍ନାୟୁ ଯନ୍ତ୍ରଣା ଅନୁଭବ ହୋଇଥାଏ, ଯାହାକୁ ପୋଷ୍ଟ-ହର୍ପେଟିକ୍ ନ୍ୟୁରାଲଜିଆ (PHN) ବୋଲି କୁହାଯାଏ।
‘ଶିଙ୍ଗଲ୍ସ ଆକ୍ସନ୍ ୱିକ୍ ୨୦୨୬’ ଅବସରରେ କରାଯାଇଥିବା ଏକ ବିଶ୍ୱସ୍ତରୀୟ ସର୍ଭେ ଅନୁସାରେ, ଶିଙ୍ଗଲ୍ସରେ ପୀଡ଼ିତ ପ୍ରାୟ ୪୩ ପ୍ରତିଶତ ଭାରତୀୟ ଅସହ୍ୟ ଯନ୍ତ୍ରଣାର ସମ୍ମୁଖୀନ ହୋଇଥିବା କହିଛନ୍ତି। ଏହି ଯନ୍ତ୍ରଣା ଯୋଗୁଁ ସେମାନଙ୍କର ଦୈନନ୍ଦିନ ଜୀବନ, କାର୍ଯ୍ୟକ୍ଷେତ୍ର ଓ ସାମାଜିକ ଜୀବନ ଗୁରୁତର ଭାବେ ପ୍ରଭାବିତ ହୋଇଥିଲା।
ବିଶେଷଜ୍ଞଙ୍କ ମତରେ, CKD ରୋଗୀଙ୍କ ପାଇଁ ଶିଙ୍ଗଲ୍ସ ଅଧିକ ବିପଜ୍ଜନକ ହୋଇପାରେ। ଏହା ଯୋଗୁଁ ନିୟମିତ ଔଷଧ ସେବନ, ଡାକ୍ତରଙ୍କ ପରାମର୍ଶ ଓ ଡାଏଟ୍ ପାଳନ କରିବା ମଧ୍ୟ କଷ୍ଟସାଧ୍ୟ ହୋଇପଡ଼େ। ବିଶେଷ କରି କିଡନୀ ରୋଗ ଯଦି ଶେଷ ପର୍ଯ୍ୟାୟ ଏଣ୍ଡ-ଷ୍ଟେଜ୍ ରେନାଲ୍ ଡିଜିଜ୍ (ESRD) କୁ ପହଞ୍ଚିଯାଏ, ତେବେ ଶରୀରର ଇମ୍ୟୁନ୍ ସିଷ୍ଟମ୍ ଅତ୍ୟଧିକ ଦୁର୍ବଳ ହୋଇଯାଏ।
ସେଥିପାଇଁ ଚିକିତ୍ସକମାନେ CKD ରୋଗୀଙ୍କୁ ନିୟମିତ କିଡନୀ ପରୀକ୍ଷା, ସନ୍ତୁଳିତ ଖାଦ୍ୟ, ସମୟମତେ ଔଷଧ ସେବନ ସହ ଶିଙ୍ଗଲ୍ସ ବିରୋଧୀ ଟିକାକରଣ କରାଇବାକୁ ପରାମର୍ଶ ଦେଉଛନ୍ତି। ସଠିକ୍ ସମୟରେ ଟିକା ନେଲେ ଶିଙ୍ଗଲ୍ସ ସଂକ୍ରମଣ ଓ ଏହାର ଜଟିଳତାର ଆଶଙ୍କା ଅନେକାଂଶରେ କମିଥାଏ ଏବଂ ରୋଗୀ ସୁସ୍ଥ ଓ ସୁରକ୍ଷିତ ଜୀବନ ବିତାଇପାରନ୍ତି।
