BJD PROTEST: ଭୁବନେଶ୍ୱର (ରିପୋଟର୍ସ ପେନ୍) : ଫକୀରମୋହନ କଲେଜ ଛାତ୍ରୀ ସୌମ୍ୟାଶ୍ରୀଙ୍କ ଆତ୍ମାହୁତି ଘଟଣାର ବିଚାର ବିଭାଗୀୟ ତଦନ୍ତ ଦାବି କରି ବୁଧବାର ବିଜେଡି ପକ୍ଷରୁ ଲୋକସେବା ଭବନ ଘେରାଉ ଉଦ୍ୟମ ବେଳେ ଲୋୟର ପିଏମଜି ରଣକ୍ଷେତ୍ର ପାଲଟିଥିଲା। ବିଜେଡି କର୍ମୀମାନେ ବ୍ୟାରିକେଡ୍ ଭାଙ୍ଗିବା ସହ ଲୋୟର ପିଏମଜିରେ ସରକାର ବିରୋଧରେ ଗର୍ଜନ ଦେଇଥିଲେ। ପୋଲିସ ପକ୍ଷରୁ କରାଯାଇଥିବା ୪ଟି ବ୍ୟାରିକେଟ ମଧ୍ୟରୁ ବିଜେଡି କର୍ମୀମାନେ ଦୁଇଟି ବ୍ୟାରିକେଡ ଭାଙ୍ଗି ଲୋକସେବା ଭବନ ପଟକୁ ଅଗ୍ରସର ହୋଇଥିଲେ। ପୋଲିସ ବାରମ୍ବାର ବିଜେଡି ନେତା ଓ କର୍ମୀମାନଙ୍କୁ ଏଥିରୁ ନିବୃତ୍ତ ରହିବାକୁ ଅନୁରୋଧ କରିଥିଲେ ମଧ୍ୟ ଆନ୍ଦୋଳନକାରୀ ନେତାମାନେ ଏଥିରୁ ଓହରି ନ ଥିଲେ। ଫଳରେ ବାଧ୍ୟ ହୋଇ ପୋଲିସ ପକ୍ଷରୁ ଆନ୍ଦୋଳନକାରୀଙ୍କ ଉପରେ ପ୍ରଥମେ ପାଣିମାଡ଼ କରାଯାଇଥିଲା। ପାଣିମାଡ଼ ଫଳରେ ବିଜେଡି ନେତାମାନେ ଛତ୍ରଭଙ୍ଗ ଦେଇଥିଲେ ମଧ୍ୟ ପରବର୍ତ୍ତୀ ସମୟରେ ପୁଣିଥରେ ଏକତ୍ରିତ ହୋଇ ହୋହୋ ହୋଇ ଲୋକସେବା ଭବନକୁ ମାଡ଼ି ଆସିଥିଲେ। ଏହାଦେଖି ପୋଲିସ ପକ୍ଷରୁ ଟିୟର ଗ୍ୟାସ ପ୍ରୟୋଗ କରାଯାଇଥିଲା।
ବିଜେଡି ପକ୍ଷରୁ କାର୍ଯ୍ୟରତ ବିଚାରପତିଙ୍କ ଦ୍ୱାରା ବିଚାର ବିଭାଗୀୟ ଘଟଣାରେ ତଦନ୍ତ, ନୈତିକ ଦାୟିତ୍ୱ ନେଇ ମୁଖ୍ୟମନ୍ତ୍ରୀ ଓ ଉଚ୍ଚଶିକ୍ଷା ମନ୍ତ୍ରୀ ଇସ୍ତଫା ଏବଂ ଯେଉଁମାନେ ଛାତ୍ରୀଙ୍କ ଅଭିଯୋଗକୁ ଅଣଦେଖା କରିଥିଲେ, ସେମାନେ ତଦନ୍ତ ପରିସରଭୁକ୍ତ ହୁଅନ୍ତୁ ବୋଲି ଦାବି କରି ଲୋକସେବା ଭବନ ଘେରାଉ ଉଦ୍ୟମ କରିଥିଲା । ବୁଧବାର ବିଜେଡିର ଶତାଧିକ ନେତା ଓ କର୍ମୀ ସରକାର ବିରୋଧୀ ସ୍ଲୋଗାନ ଦେଇ ମାଷ୍ଟରକ୍ୟାଣ୍ଟିନ ଛକରୁ ଲୋକସେବା ଭବନ ଆଡ଼କୁ ମାଡି ଆସିଥିଲେ । ଫଳରେ ଲୋୟର ପିଏମଜିରେ ପୋଲିସ୍- ବିଜେଡି ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଥିଲା । ବିଜେଡି କର୍ମୀ ବ୍ୟାରିକେଡ଼ ଭାଙ୍ଗିବାରୁ ତାଙ୍କ ଉପରୁକୁ ପୋଲିସ ପାଣି ମାଡ ସହ ଲୁହବୁହା ଗ୍ୟାସ୍ ମାଡ଼ କରିଥିଲା । ଏହାରି ମଧ୍ୟରେ ବିଜେଡି ବରିଷ୍ଠ ନେତା ପ୍ରଣବପ୍ରକାଶ ଦାସ, ପ୍ରୀତିରଞ୍ଜନ ଘଡେଇ, ସଞ୍ଜୟ ଦାସବର୍ମା ଆହତ ହୋଇଥିଲେ। ସେହିପରି ସାଂସଦ ସୁଲତା ଦେଓ ଓ ଅନ୍ୟ କିଛି ମହିଳା ନେତ୍ରୀ ଆହତ ହୋଇ ହସ୍ପିଟାଲରେ ଭର୍ତ୍ତି ହୋଇଛନ୍ତି । ପ୍ରଣବ ପ୍ରକାଶ ଦାସ ଆପୋଲୋ ହସ୍ପିଟାଲରେ ଭର୍ତ୍ତି ହୋଇଥିବା ବେଳେ ପ୍ରୀତିରଞ୍ଜନ ଘଡେଇ ଉତ୍କଳ ହସ୍ପିଟାଲରେ ଚିକିତ୍ସିତ ହେଉଛନ୍ତି । ପରେ ଆନ୍ଦୋଳନକାରୀଙ୍କୁ ଉଠାଇ ନେଇଥିଲା ପୋଲିସ। ଶତାଧିକ ବିଜେଡି କର୍ମୀଙ୍କୁ ଅଟକ ରଖାଯାଇଛି।
ଆହତ ବିଜେଡି ନେତ୍ରୀ କହିଛନ୍ତି ଯେ, ଏ ସରକାରରେ ପୋଲିସ ବି ଗୁଣ୍ଡା ସାଜିଛି । ଆମେ ଏଠି ଜଣେ ଝିଅକୁ ନ୍ୟାୟ ଦେବା ପାଇଁ ପ୍ରତିବାଦରେ ବସିଛୁ , ଆନ୍ଦୋଳନ କରୁଛୁ । କିନ୍ତୁ ପୋଲିସ ପାଣି ମାଡ଼ କରିବା ସହ ଲୁହବୁହା ଗ୍ୟାସ୍ ମାଡ଼ କରୁଛି । ରବର ବୁଲେଟ୍ ଏପରି ପକାଇଲେ ଯେ ମୋ ଦେହରେ ମାଡ଼ ହେଲା । ଆମର ସବୁ କର୍ମୀମାନେ କ୍ଷତାକ୍ତ ହୋଇ ଯାଇଛନ୍ତି । ଆଜି ମହିଳା ସବୁଠି ଅସୁରକ୍ଷିତ । ସେମାନେ ମହିଳାମାନଙ୍କୁ ନ୍ୟାୟ ଦେଉନାହାନ୍ତି , ଓଲଟା ନିର୍ଯାତନା ଦେଉଛନ୍ତି । ସେ ଯାହା ବି କରନ୍ତୁ ଆମେ ଛାଡ଼ିବୁ ନାହିଁ , ମହିଳାଙ୍କ ନ୍ୟାୟ ପାଇଁ ଆମେ ଲଢ଼ିଛୁ ଏବଂ ଲଢ଼ିବୁ ମଧ୍ୟ। ଆମ ଘର ପାଇଁ ଆମେ ଲଢୁନୁ । ଏ ଲଢ଼େଇ ଜାରି ରହିବ ।
