ଲୁଟେରାଙ୍କ ସହ ମହିଳା କେତ୍ରାଙ୍କୁ ବାନ୍ଧିଲା ପୋଲିସ
ଭୁବନେଶ୍ୱର, (ରିପୋଟର୍ସ ପେନ୍) : ମହିଳା ବେଶରେ ରାଜଧାନୀର ବିଭିନ୍ନ ଥାନା ଅଞ୍ଚଳରେ ବୁଲିବୁଲି ବାଇକ ଯୋଗେ ସୁନା ଚେନ ଲୁଟ୍ କରିବା ଏକ ଗ୍ୟାଙ୍ଗର ମୁଖ୍ୟ ମାଷ୍ଟର ମାଇଣ୍ଡଙ୍କୁ ପୋଲିସ ଗିରଫ କରିଛି । ପୋଲିସ ଏଥିସହ ଚୋରା ସୁନା କିଣୁଥିବା ଜଣେ ମହିଳା କେତ୍ରାଙ୍କୁ ମଧ୍ୟ ଗିରଫ କରିଛି । ଗିରଫ ଅଭିଯୁକ୍ତଙ୍କ ନାମ ଦେବୀ ପ୍ରସାଦ ରାଉଳ ଓରଫ ସୋନୁ (୨୩) ଓ ତାଙ୍କ ଘର ଖୋର୍ଦ୍ଧା ଟାଉନ ପୋଲିସ ଅଞ୍ଚଳରେ ବୋଲି ଜଣାପଡିଛି । ଏଥିସହ ପୋଲିସ ସୁନା କିଣୁଥିବା ମହିଳା କେତ୍ରା ଗଡ ଖୋର୍ଦ୍ଧା ହାଉର୍ସିଂ ବୋର୍ଡ କଲୋନୀର ରଶ୍ମିତା ବିଜୁଳି (୨୧)ଙ୍କୁ ମଧ୍ୟ ଗିରଫ କରିଛି । ଏନେଇ ନମିତା ପାଣି ଥାନାରେ ଅଭିଯୋଗ କରିଥିଲେ ।
ସୂଚନାଯୋଗ୍ୟ ଯେ, ମେ ୧୦ ତାରିଖ ଦିନ ପ୍ରାୟ ସକାଳ ୧୧ଟା୫୦ ସମୟରେ ଅଭିଯୋଗକାରିଣୀ ଡେଲଟା ଛକ ଜଳେଶ୍ୱର ମନ୍ଦିର ନିକଟରେ ଛତୁ କିଣିବା ପାଇଁ ନିଜ ଗାଡ଼ିରୁ ଓହ୍ଲାଇଥିବା ବେଳେ ଏକ ପଲସର-୨୨୦ ମୋଟରସାଇକେଲରେ ଆସିଥିବା ଦୁଇଜଣ ଦୁର୍ବୃତ୍ତ, ଯାହାଙ୍କ ମଧ୍ୟରୁ ଜଣେ ମହିଳା ବେଶରେ ଥିଲେ, ତାଙ୍କ ବେକରୁ ପ୍ରାୟ ୧୮ ଗ୍ରାମ ଓଜନର ୨୨ କ୍ୟାରେଟ ସୁନା ଚେନ୍ ଛିନତାଇ କରିଥିଲେ । ଚେନ୍ ଛିନତାଇ ସମୟରେ ଅଭିଯୋଗକାରିଣୀ ରାସ୍ତାରେ ପଡ଼ିଯାଇ ଆହତ ହୋଇଥିଲେ । ଘଟଣା ପରେ ଦୁର୍ବୃତ୍ତମାନେ ଷ୍ଟୁଆର୍ଟ ସ୍କୁଲ୍ ଆଡ଼କୁ ପଳାଇ ଯାଇଥିଲେ । ତଦନ୍ତ ସମୟରେ ସିସିଟିଭି ଫୁଟେଜ ଯାଞ୍ଚ କରାଯାଇଥିଲା । ଯାଞ୍ଚରୁ ଜଣାପଡ଼ିଥିଲା ଯେ ଅଭିଯୁକ୍ତମାନେ ମୋଟରସାଇକେଲର ନମ୍ବର ପ୍ଲେଟକୁ ଲୁଚାଇ ଯୋଜନାବଦ୍ଧ ଭାବେ ଅପରାଧ ଘଟାଇଥିଲେ । ତଦନ୍ତରେ ଆହୁରି ଜଣାପଡ଼ିଥିଲା ଯେ ସେହି ଦୁଇଜଣ ଅଭିଯୁକ୍ତ ସେହି ଦିନ ନୟାପଲ୍ଲୀ, ଖଣ୍ଡଗିରି ଓ ତମାଣ୍ଡୋ ଥାନା ଅଞ୍ଚଳରେ ଏବଂ ପରବର୍ତ୍ତୀ ସମୟରେ ନୟାପଲ୍ଲୀ ଓ ଚନ୍ଦକା ଥାନା ଅଞ୍ଚଳରେ ମଧ୍ୟ ସମାନ ପ୍ରକାର ଚେନ୍ ଛିନତାଇ ଘଟଣା ଘଟାଇଥିଲେ । ସିସିଟିଭି ଫୁଟେଜ ଯାଞ୍ଚ ଆଧାରରେ ମୋଟରସାଇକେଲ ଚାଳକ ଦେବୀ ପ୍ରସାଦ ରାଉଳ ଓରଫ ସୋନୁ ଏବଂ ପଛରେ ମହିଳା ବେଶରେ ବସିଥିବା ସହଯୋଗୀ ପ୍ରତ୍ୟୁଷ ବଳବନ୍ତରାୟ ଓରଫ ଅଂଶୁଙ୍କୁ ଚିହ୍ନଟ କରାଯାଇଥିଲା । ବାରମ୍ବାର ଚଢ଼ଉ ସତ୍ତ୍ୱେ ସେମାନେ ଫେରାର ରହିଥିଲେ ।
ଶନିବାର ବିଶ୍ୱସ୍ତ ସୂତ୍ରରୁ ଖବରପାଇ ପୋଲିସ ଅଭିଯୁକ୍ତ ଦେବୀ ପ୍ରସାଦ ରାଉଳଙ୍କୁ ତାଙ୍କ ଘରୁ କାବୁ କରିଥିଲା । ପଚରାଉଚରା ବେଳେ ସେ ସହଯୋଗୀ ପ୍ରତ୍ୟୁଷ ବଳବନ୍ତରାୟଙ୍କ ସହ ମିଶି ଭୁବନେଶ୍ୱରର ବିଭିନ୍ନ ଥାନା ଅଞ୍ଚଳରେ ଏକାଧିକ ଚେନ୍ ଛିନତାଇ କରିଥିବା ସ୍ୱୀକାର କରିଥିଲେ । ଲୋକଙ୍କ ସନ୍ଦେହ ଏଡ଼ାଇବା ପାଇଁ ଅଂଶୁ ମହିଳା ବେଶ ଧାରଣ କରୁଥିବା ବେଳେ ସେ ନିଜ ଚେହେରା ଲୁଚାଇବା ପାଇଁ ବିଭିନ୍ନ ପ୍ରକାର ବେଶଭୂଷା ବ୍ୟବହାର କରୁଥିବା କଥା ମଧ୍ୟ ସ୍ୱୀକାର କରିଥିଲେ । ସେ ଚୋରା ସୁନା ଚେନ୍ଗୁଡ଼ିକୁ ବିଭିନ୍ନ ଗୋଲ୍ଡ ଲୋନ୍ କମ୍ପାନୀରେ ବନ୍ଧକ ରଖି ଟଙ୍କା ନେଇଥିବା କଥା ମଧ୍ୟ ପ୍ରକାଶ କରିଥିଲେ ।
ତଦନ୍ତରେ ଆହୁରି ଜଣାପଡ଼ିଥିଲା ଯେ ଅଭିଯୁକ୍ତା ରଶ୍ମିତା ବିଜୁଳି ଜାଣିଶୁଣି ଚୋରା ସୁନା ଚେନ୍ ଗ୍ରହଣ କରିବା ସହ ତାହାକୁ ବିକ୍ରୟ କରିବାରେ ଅଭିଯୁକ୍ତମାନଙ୍କୁ ସହଯୋଗ କରୁଥିଲେ ଏବଂ ସେଥିପାଇଁ ୩୫ ହଜାର କମିଶନ ମଧ୍ୟ ପାଇଥିଲେ । ପରବର୍ତ୍ତୀ ଚଢ଼ଉରେ ତାଙ୍କୁ କାବୁ କରାଯାଇଥିଲା । ପଚରାଉଚରା ବେଳେ ସେ ଅପରାଧରେ ନିଜ ସମ୍ପୃକ୍ତି ସ୍ୱୀକାର କରିବା ସହ ଅଭିଯୋଗକାରିଣୀଙ୍କଠାରୁ ଛିନତାଇ ହୋଇଥିବା ସୁନା ଚେନ୍ ନିଜ ପାଖରେ ରଖିଥିବା କଥା କହିଥିଲେ । ତାଙ୍କ ସୂଚନା ଆଧାରରେ ଉକ୍ତ ସୁନା ଚେନ୍ ଜବତ କରାଯାଇଥିଲା । ଅଭିଯୁକ୍ତ ମାନଙ୍କର ପୂର୍ବ ଅପରାଧିକ ରେକର୍ଡ ଯାଞ୍ଚରୁ ଅଭିଯୁକ୍ତ ଦେବୀ ପ୍ରସାଦ ରାଉଳ ଜଣେ ଅଭ୍ୟାସଗତ ଅପରାଧୀ ଜଣାପଡିଥିବା ବେଳେ ବିଭିନ୍ନ ଥାନା ଯଥା,- ଖୋର୍ଦ୍ଧା ଟାଉନ ଥାନା, ଚନ୍ଦ୍ରଶେଖରପୁର ଥାନା, ନୟାପଲ୍ଲୀ ଥାନା, ତମାଣ୍ଡୋ ଥାନା ଏବଂ ଚନ୍ଦକା ଥାନା ଅଧୀନରେ ମୋଟ ୧୦ ଟି ସମାନ ପ୍ରକାର ମାମଲାରେ ଜଡିତ ଥିବା ମଧ୍ୟ ଜଣାପଡିଛି । ଅଭିଯୁକ୍ତ ଦେବୀ ପ୍ରସାଦ ରାଉଳ ଏବଂ ରଶ୍ମିତା ବିଜୁଳିଙ୍କୁ ଗିରଫ କରାଯାଇ ଆଜି କୋର୍ଟ ଚାଲାଣ କରାଯାଇଛି । ଫେରାର ସହଅଭିଯୁକ୍ତ ପ୍ରତ୍ୟୁଷ ବଳବନ୍ତରାୟଙ୍କୁ ଗିରଫ କରିବା ଏବଂ ଅନ୍ୟାନ୍ୟ ଚୋରା ସୁନା ଗହଣା ଉଦ୍ଧାର କରିବା ପାଇଁ ବର୍ତମାନ ଏହି ମାମଲାର ଅଧିକ ତଦନ୍ତ ଚାଲୁ ରହିଛି ।
