ନୂଆଦିଲ୍ଲୀ: ଭାରତୀୟ କ୍ରିକେଟ୍ ଟିମ୍ର ଆହତ ସମସ୍ୟା ଏବେ ଚିନ୍ତା ବଢ଼ାଇଛି। କେବଳ ଜସପ୍ରୀତ ବୁମରାହ କିମ୍ବା ସାଇ ସୁଦର୍ଶନ ନୁହନ୍ତି, ଟିମ୍ ଇଣ୍ଡିଆର ମୋଟ ୧୩ ଜଣ ଖେଳାଳି ବର୍ତ୍ତମାନ ବେଙ୍ଗାଲୁରୁସ୍ଥିତ ବିସିସିଆଇ ସେଣ୍ଟର ଅଫ୍ ଏକ୍ସିଲେନ୍ସ (CoE)ରେ ରିହାବିଲିଟେସନ୍ ପ୍ରକ୍ରିୟା ଦେଇ ଗତି କରୁଥିବା ଜଣାପଡ଼ିଛି।
ଖେଳାଳିଙ୍କ ଆହତ ସମସ୍ୟା ଯୋଗୁ ଭାରତୀୟ ଟିମ୍ର ତିନୋଟି ଫର୍ମାଟ୍—ଟେଷ୍ଟ, ଦିନିକିଆ ଓ ଟି-୨୦—ପ୍ରଭାବିତ ହେଉଛି। ବିସିସିଆଇର ସେଣ୍ଟର ଅଫ୍ ଏକ୍ସିଲେନ୍ସରେ ଖେଳାଳିଙ୍କ ରିହାବିଲିଟେସନ୍ ପ୍ରକ୍ରିୟାକୁ ନେଇ ମଧ୍ୟ ପ୍ରଶ୍ନ ଉଠିଛି। ଫିଜିଓ ଓ ମ୍ୟାନେଜମେଣ୍ଟ ବ୍ୟବସ୍ଥାକୁ ନେଇ ମଧ୍ୟ ଆଲୋଚନା ଆରମ୍ଭ ହୋଇଛି।
ଜସପ୍ରୀତ ବୁମରାହ
ଭାରତର ଷ୍ଟାର୍ ଫାଷ୍ଟ ବୋଲର ଜସପ୍ରୀତ ବୁମରାହ ଆହତ ସମସ୍ୟାରେ ଅଛନ୍ତି। ଇଂଲଣ୍ଡ ବିପକ୍ଷ ଦିନିକିଆ ସିରିଜ୍ର ଦ୍ୱିତୀୟ ମ୍ୟାଚ୍ରେ ବାଉଣ୍ଡାରୀ ଲାଇନ୍ରେ ଫିଲ୍ଡିଂ କରୁଥିବା ସମୟରେ ସେ ଆହତ ହୋଇଥିଲେ। ତାଙ୍କ ଆଣ୍ଠୁରେ ପାଣି ଜମିଥିବା ସମସ୍ୟା ହୋଇଥିଲା, ଯାହାକୁ ଇଞ୍ଜେକ୍ସନ୍ ମାଧ୍ୟମରେ ବାହାର କରାଯାଇଥିଲା। ଫିଟ୍ନେସ୍ ସର୍ତ୍ତରେ ତାଙ୍କୁ ଶ୍ରୀଲଙ୍କା ଗସ୍ତ ପାଇଁ ଚୟନ କରାଯାଇଥିଲେ ମଧ୍ୟ ପରେ ଅଧିକ ବିଶ୍ରାମ ଦେବା ପାଇଁ ତାଙ୍କୁ ଦଳରୁ ବାଦ୍ ଦିଆଯାଇଥିଲା।
ହାର୍ଦ୍ଦିକ ପାଣ୍ଡ୍ୟା
ଭାରତୀୟ ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା ଲେଫ୍ଟ କ୍ୱାଡ୍ରିସେପ୍ସ ଇଞ୍ଜୁରୀରେ ପୀଡ଼ିତ। ଆଇପିଏଲ୍ ୨୦୨୬ ସମୟରେ ସେ ଆହତ ହୋଇଥିଲେ। ଶୀଘ୍ର ସୁସ୍ଥ ହେବା ପାଇଁ ସେ ବେଙ୍ଗାଲୁରୁରେ ରହି ରିହାବିଲିଟେସନ୍ କରୁଛନ୍ତି।
ହର୍ଷିତ ରାଣା
ଯୁବ ଫାଷ୍ଟ ବୋଲର ହର୍ଷିତ ରାଣା ମଧ୍ୟ ଆହତ ତାଲିକାରେ ଅଛନ୍ତି। ହାମ୍ଷ୍ଟ୍ରିଙ୍ଗ୍ ସମସ୍ୟା ଯୋଗୁ ସେ ଇଂଲଣ୍ଡ ଗସ୍ତରୁ ପ୍ରଭାବିତ ହୋଇଥିଲେ। ଏହା ପୂର୍ବରୁ ଆହତ କାରଣରୁ ସେ ୱାର୍ଲ୍ଡ କପ୍ ଓ ଆଇପିଏଲ୍ରେ ମଧ୍ୟ ଖେଳିପାରିନଥିଲେ।
ନୀତିଶ କୁମାର ରେଡ୍ଡୀ
ହାର୍ଦ୍ଦିକ ପାଣ୍ଡ୍ୟାଙ୍କ ବିକଳ୍ପ ଭାବେ ଦେଖାଯାଉଥିବା ନୀତିଶ କୁମାର ରେଡ୍ଡୀ ନିଜେ ଆହତ ହୋଇଛନ୍ତି। ତାଙ୍କର ମଧ୍ୟ ଲେଫ୍ଟ କ୍ୱାଡ୍ରିସେପ୍ସ ଇଞ୍ଜୁରୀ ରହିଛି। ଆଫଗାନିସ୍ତାନ ବିପକ୍ଷ ଦିନିକିଆ ସିରିଜ୍ ସମୟରେ ସେ ଆହତ ହୋଇଥିଲେ।
ସାଇ ସୁଦର୍ଶନ
ବାମହାତୀ ବ୍ୟାଟର ସାଇ ସୁଦର୍ଶନ ବର୍ତ୍ତମାନ CoEରେ ରିହାବ୍ କରୁଛନ୍ତି। ତାଙ୍କ ଡାହାଣ ପାଦରେ ଷ୍ଟ୍ରେସ୍ ସମସ୍ୟା ରହିଛି। ଶ୍ରୀଲଙ୍କା ଗସ୍ତ ପାଇଁ ଫିଟ୍ ହେବେ ବୋଲି ଆଶା କରାଯାଇ ତାଙ୍କୁ ଫିଟ୍ନେସ୍ ସର୍ତ୍ତରେ ଦଳରେ ଚୟନ କରାଯାଇଥିଲା। କିନ୍ତୁ ଏବେ ସେ ଗସ୍ତରୁ ସମ୍ପୂର୍ଣ୍ଣ ବାଦ୍ ପଡ଼ିଛନ୍ତି।
ବରୁଣ ଚକ୍ରବର୍ତ୍ତୀ
ବରୁଣ ଚକ୍ରବର୍ତ୍ତୀ ଆଇପିଏଲ୍ ୨୦୨୬ ସମୟରେ ଆହତ ହୋଇଥିଲେ। ଆହତ ଥିବା ସତ୍ତ୍ୱେ ସେ ବୋଲିଂ କରିଥିବାରୁ ଏହାକୁ ନେଇ ମଧ୍ୟ ପ୍ରଶ୍ନ ଉଠିଥିଲା। ପରେ ଇଂଲଣ୍ଡ ବିପକ୍ଷ ଟି-୨୦ ସିରିଜ୍ ସମୟରେ ତାଙ୍କ ହାମ୍ଷ୍ଟ୍ରିଙ୍ଗ୍ ଟାଣି ଯାଇଥିଲା।
ୱାଶିଂଟନ୍ ସୁନ୍ଦର
ୱାଶିଂଟନ୍ ସୁନ୍ଦର ଟେଷ୍ଟ କ୍ରିକେଟ୍ରେ ଭଲ ପ୍ରଦର୍ଶନ କରୁଥିଲେ। କିନ୍ତୁ ହାମ୍ଷ୍ଟ୍ରିଙ୍ଗ୍ ଇଞ୍ଜୁରୀ ଯୋଗୁ ସେ ଏବେ ଖେଳିପାରୁନାହାନ୍ତି। ସେ ମଧ୍ୟ ବେଙ୍ଗାଲୁରୁ CoEରେ ରିହାବିଲିଟେସନ୍ କରୁଛନ୍ତି।
ଆକାଶ ଦୀପ
ଭାରତୀୟ ଫାଷ୍ଟ ବୋଲର ଆକାଶ ଦୀପ ଲୋୟର ବ୍ୟାକ୍ ଷ୍ଟ୍ରେସ୍ ଫ୍ରାକ୍ଚର ସମସ୍ୟାରେ ପୀଡ଼ିତ। ଏହା ଏକ ଗୁରୁତର ଆହତ ସମସ୍ୟା ହୋଇଥିବାରୁ ସେ ବର୍ତ୍ତମାନ CoEରେ ରିହାବିଲିଟେସନ୍ କରୁଛନ୍ତି।
ଅଶୋକ ଶର୍ମା
ଅଶୋକ ଶର୍ମା ଲୋୟର ବ୍ୟାକ୍ ଷ୍ଟ୍ରେସ୍ ଫ୍ରାକ୍ଚର ଓ ରିବ୍ ଫ୍ରାକ୍ଚର ସମସ୍ୟାରେ ଅଛନ୍ତି। ସେ ନିକଟରେ ଜିମ୍ବାୱେ ବିପକ୍ଷରେ ଅନ୍ତର୍ଜାତୀୟ ଡେବ୍ୟୁ କରିଥିଲେ। ପ୍ରଥମ ସିରିଜ୍ରେ ହିଁ ଆହତ ହୋଇ ସେ ଏବେ CoEରେ ରିହାବ୍ କରୁଛନ୍ତି।
ହିମାଂଶୁ ସିଂହ
ମୁମ୍ବାଇ ପାଇଁ ରଣଜୀ ଟ୍ରଫି ଖେଳୁଥିବା ଯୁବ ଅଫ୍ ସ୍ପିନର ହିମାଂଶୁ ସିଂହ ମଧ୍ୟ ଆହତ। ତାଙ୍କ ଡାହାଣ ଆଣ୍ଠୁରେ ଇଞ୍ଜୁରୀ ରହିଛି।
ପ୍ରିନ୍ସ ଯାଦବ
ଯୁବ ଫାଷ୍ଟ ବୋଲର ପ୍ରିନ୍ସ ଯାଦବ ଜିମ୍ବାୱେ ବିପକ୍ଷ ଦ୍ୱିତୀୟ ଟି-୨୦ ମ୍ୟାଚ୍ରେ ଆହତ ହୋଇଥିଲେ। ମାଂସପେଶୀରେ ଟାଣ ଲାଗିବା ପରେ ତାଙ୍କୁ ପଡ଼ିଆ ଛାଡ଼ିବାକୁ ପଡ଼ିଥିଲା। ହାମ୍ଷ୍ଟ୍ରିଙ୍ଗ୍ ଇଞ୍ଜୁରୀ କାରଣରୁ ଚାଲିବାରେ ମଧ୍ୟ ସମସ୍ୟା ହୋଇଥିଲା। ବର୍ତ୍ତମାନ ସେ CoEରେ ରିହାବ୍ କରୁଛନ୍ତି।
ରିୟାନ୍ ପରାଗ
ରାଜସ୍ଥାନ ରୟାଲ୍ସର ଅଧିନାୟକ ରିୟାନ୍ ପରାଗ ମଧ୍ୟ ଆହତ। ଡାହାଣ କାନ୍ଧରେ ଅସ୍ତ୍ରୋପଚାର ପରେ ତାଙ୍କର ରିକଭରି ବେଙ୍ଗାଲୁରୁରେ ଚାଲିଛି। ଆହତ କାରଣରୁ ସେ ଭାରତୀୟ ଦଳରୁ ମଧ୍ୟ ବାଦ୍ ପଡ଼ିଛନ୍ତି।
ସୁୟଶ ଶର୍ମା
ଯୁବ ସ୍ପିନର ସୁୟଶ ଶର୍ମା ପାଟେଲାର ଟେଣ୍ଡିନୋପାଥି ସମସ୍ୟାରେ ପୀଡ଼ିତ। ତାଙ୍କର ଉଭୟ ଆଣ୍ଠୁରେ ସମସ୍ୟା ଦେଖାଦେଇଛି। ଆଣ୍ଠୁର ଶକ୍ତି ବଢ଼ାଇବା ପାଇଁ ଇଞ୍ଜେକ୍ସନ୍ ଦିଆଯାଉଥିବା ବେଳେ ସେ ମଧ୍ୟ ବିସିସିଆଇ ସେଣ୍ଟର ଅଫ୍ ଏକ୍ସିଲେନ୍ସରେ ରିକଭରି କରୁଛନ୍ତି।
ଆହତ ଖେଳାଳିଙ୍କୁ ନେଇ ବଢ଼ିଲା ଚିନ୍ତା
ଟିମ୍ ଇଣ୍ଡିଆର ଏତେ ସଂଖ୍ୟକ ଖେଳାଳି ଏକାସାଙ୍ଗରେ ଆହତ ହେବା ଭାରତୀୟ କ୍ରିକେଟ୍ ପାଇଁ ଚିନ୍ତାର ବିଷୟ ପାଲଟିଛି। ବିଶେଷକରି ତିନୋଟି ଫର୍ମାଟ୍ରେ ଖେଳୁଥିବା ଖେଳାଳିଙ୍କ ଉପରେ ଏହାର ପ୍ରଭାବ ପଡ଼ିପାରେ। ଏବେ ସମସ୍ତଙ୍କ ନଜର ବିସିସିଆଇର ରିହାବିଲିଟେସନ୍ ବ୍ୟବସ୍ଥା ଓ ଏହି ଖେଳାଳିମାନେ କେବେ ସମ୍ପୂର୍ଣ୍ଣ ଫିଟ୍ ହୋଇ ପଡ଼ିଆକୁ ଫେରିବେ, ତା’ ଉପରେ ରହିଛି।
