ସାମସନ-ଅଭିଷେକଙ୍କ ବ୍ୟାଟ୍ ଗର୍ଜନ, ୭ ୱିକେଟ୍ରେ ଜିତିଲା ଭାରତ; ସିରିଜ୍ କବ୍ଜା
ନୂଆଦିଲ୍ଲୀ: ଆଫଗାନିସ୍ତାନ ବିପକ୍ଷ ଦ୍ୱିତୀୟ ଟି-୨୦ରେ ଭାରତ ୭ ୱିକେଟ୍ରେ ଦମଦାର ବିଜୟ ହାସଲ କରିଛି। ଦିଲ୍ଲୀର ଅରୁଣ ଜେଟଲୀ ଷ୍ଟାଡିୟମ୍ରେ ଖେଳାଯାଇଥିବା ଏହି ମ୍ୟାଚ୍ରେ ପ୍ରଥମେ ବ୍ୟାଟିଂ କରି ଆଫଗାନିସ୍ତାନ ୨୦ ଓଭରରେ ୮ ୱିକେଟ୍ ହରାଇ ୧୫୯ ରନ୍ କରିଥିଲା। ଜବାବରେ ଭାରତୀୟ ଦଳ ମାତ୍ର ୧୪.୫ ଓଭରରେ ୩ ୱିକେଟ୍ ହରାଇ ୧୬୦ ରନ୍ର ଲକ୍ଷ୍ୟ ହାସଲ କରିନେଇଥିଲା।
ଏହି ବିଜୟ ସହ ଭାରତ ତିନି ମ୍ୟାଚ୍ ବିଶିଷ୍ଟ ଟି-୨୦ ସିରିଜ୍ରେ ୨-୦ର ଅପରାଜେୟ ଅଗ୍ରଣୀ ହାସଲ କରି ସିରିଜ୍କୁ ନିଜ ନାମରେ କରିଛି।
ଭାରତର ବିଜୟରେ ଓପନର ସଞ୍ଜୁ ସାମସନ୍ ଏବଂ ଅଭିଷେକ ଶର୍ମାଙ୍କ ବିସ୍ଫୋରକ ବ୍ୟାଟିଂ ପ୍ରମୁଖ ଭୂମିକା ନେଇଥିଲା। ସଞ୍ଜୁ ମାତ୍ର ୨୨ ବଲ୍ରେ ୫୭ ରନ୍ର ତୁଫାନୀ ପାଳି ଖେଳିଥିଲେ। ତାଙ୍କ ଇନିଂସରେ ୭ଟି ଚୌକା ଓ ୪ଟି ଛକା ସାମିଲ ଥିଲା। ଅନ୍ୟପକ୍ଷରେ ଅଭିଷେକ ଶର୍ମା ୧୯ ବଲ୍ରୁ ୩୯ ରନ୍ କରିଥିଲେ। ସେ ୨ଟି ଚୌକା ଓ ୪ଟି ଛକା ମାରିଥିଲେ।
ପାୱାରପ୍ଲେରେ ହିଁ ବିଜୟର ଭିତ୍ତି
୧୬୦ ରନ୍ର ଲକ୍ଷ୍ୟ ପିଛା କରି ଭାରତ ପାୱାରପ୍ଲେରେ କୌଣସି ୱିକେଟ୍ ନହରାଇ ୮୨ ରନ୍ ସଂଗ୍ରହ କରିଥିଲା। ଭାରତୀୟ ବ୍ୟାଟରଙ୍କୁ ରୋକିବା ପାଇଁ ଆଫଗାନିସ୍ତାନ ଦୁଇ ପଟୁ ସ୍ପିନରଙ୍କୁ ବୋଲିଂ ଦେଇଥିଲା। ହେଲେ ସଞ୍ଜୁ ଓ ଅଭିଷେକଙ୍କ ଆକ୍ରମଣାତ୍ମକ ବ୍ୟାଟିଂ ସାମ୍ନାରେ ଆଫଗାନ୍ ବୋଲରଙ୍କ ରଣନୀତି କାମ କରିନଥିଲା।
୨୦ ବଲ୍ରେ ସାମସନଙ୍କ ଅର୍ଦ୍ଧଶତକ
ସଞ୍ଜୁ ସାମସନ୍ ମାତ୍ର ୨୦ ବଲ୍ରେ ନିଜ ଅର୍ଦ୍ଧଶତକ ପୂରଣ କରିଥିଲେ। ଏକ ସମୟରେ ସେ ୧୦ ବଲ୍ରେ ମାତ୍ର ୮ ରନ୍ କରିଥିଲେ। ଏହା ପରେ ତାଙ୍କ ବ୍ୟାଟ୍ରୁ ରନ୍ର ବର୍ଷା ହୋଇଥିଲା। ପରବର୍ତ୍ତୀ ୧୨ ବଲ୍ରେ ସେ ୪୯ ରନ୍ ସଂଗ୍ରହ କରିଥିଲେ। ଶେଷରେ ୨୨ ବଲ୍ରେ ୫୭ ରନ୍ କରି ଆଉଟ୍ ହୋଇଥିଲେ। ତାଙ୍କ ଷ୍ଟ୍ରାଇକ୍ ରେଟ୍ ୨୫୯ ଥିଲା।
ଅଭିଷେକ ମଧ୍ୟ ଆରମ୍ଭରୁ ଆକ୍ରମଣାତ୍ମକ ରହିଥିଲେ। ସେ ୧୯ ବଲ୍ରେ ୩୯ ରନ୍ କରିଥିଲେ। ତାଙ୍କ ଇନିଂସରେ ୨ଟି ଚୌକା ଓ ୪ଟି ଛକା ରହିଥିଲା।
ତିନି ୱିକେଟ୍ ହରାଇ ଲକ୍ଷ୍ୟ ହାସଲ
ଭାରତର ପ୍ରଥମ ୱିକେଟ୍ ସପ୍ତମ ଓଭରରେ ୮୮ ରନ୍ ସ୍କୋରରେ ପଡ଼ିଥିଲା। ସେହି ଓଭରରେ ଭାରତ ୯୯ ରନ୍ରେ ଦ୍ୱିତୀୟ ୱିକେଟ୍ ମଧ୍ୟ ହରାଇଥିଲା। ଉଭୟ ଓପନର ପ୍ୟାଭିଲିୟନ୍ ଫେରିବା ପରେ ଅଧିନାୟକ ଶ୍ରେୟସ ଆୟର ୧୧ ବଲ୍ରୁ ଗୋଟିଏ ଛକା ସହ ୧୧ ରନ୍ କରି ଆଉଟ୍ ହୋଇଥିଲେ।
ତିନି ନମ୍ବରରେ ବ୍ୟାଟିଂ କରିବାକୁ ଆସିଥିବା ଈଶାନ କିଶନ୍ ୨୩ ବଲ୍ରେ ୩୮ ରନ୍ କରି ଅପରାଜିତ ରହିଥିଲେ। ସେ ୩ଟି ଚୌକା ଓ ୨ଟି ଛକା ମାରିଥିଲେ। ଉପଅଧିନାୟକ ତିଲକ ବର୍ମା ୧୪ ବଲ୍ରେ ଗୋଟିଏ ଚୌକା ସହ ୧୫ ରନ୍ କରି ନଟ୍ଆଉଟ୍ ରହିଥିଲେ।
ଆଫଗାନିସ୍ତାନ ୧୫୯ ରନ୍ରେ ସୀମିତ
ଏହା ପୂର୍ବରୁ ଆଫଗାନିସ୍ତାନ ପକ୍ଷରୁ ଅଧିନାୟକ ଇବ୍ରାହିମ ଜାଦରାନ୍ ୩୭ ରନ୍ କରିଥିଲେ। ରାଶିଦ ଖାନ୍ ୨୮, ମହମ୍ମଦ ନବୀ ୨୦ ଏବଂ ଦାରୱିଶ ରସୁଲି ୨୬ ରନ୍ର ଯୋଗଦାନ ଦେଇଥିଲେ। ଗୁରବାଜ ଖାତା ଖୋଲିପାରିନଥିବା ବେଳେ ସେଦିକୁଲ୍ଲାହ ଅଟଲ ୧୨, ଗୁଲବଦିନ ନାଏବ ୧୦ ଏବଂ ଅଜମତୁଲ୍ଲା ଓମରଜାଇ ୧୧ ରନ୍ କରିଥିଲେ।
ଭାରତ ପକ୍ଷରୁ ନିତୀଶ କୁମାର ରେଡ୍ଡୀ ଦମଦାର ବୋଲିଂ କରି ୩ଟି ୱିକେଟ୍ ହାସଲ କରିଥିଲେ। ତାଙ୍କ ବୋଲିଂ ଏବଂ ସାମସନ-ଅଭିଷେକଙ୍କ ବିସ୍ଫୋରକ ବ୍ୟାଟିଂ ବଳରେ ଭାରତ ମ୍ୟାଚ୍କୁ ଏକତରଫା ଭାବେ ଜିତିବା ସହ ଟି-୨୦ ସିରିଜ୍ ମଧ୍ୟ ନିଜ ନାମରେ କରିଛି।
