ଅକଲାଣ୍ଡ: ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ବୁଧବାର (୦୪ ନଭେମ୍ବର) ଅକଲାଣ୍ଡର ଇଡେନ୍ ପାର୍କରେ ପ୍ରଥମ ଦିନିକିଆ ମ୍ୟାଚ୍ ଖେଳାଯାଇଥିଲା। ବର୍ଷା ଯୋଗୁଁ ବାଧାପ୍ରାପ୍ତ ଏହି ମ୍ୟାଚ୍ରେ ଶୁଭମନ ଗିଲ୍ଙ୍କ ନେତୃତ୍ୱାଧୀନ ଭାରତୀୟ ଦଳ ଡିଏଲ୍ଏସ୍ (DLS) ନିୟମ ଅନୁସାରେ ୫ ୱିକେଟ୍ରେ ବିଜୟୀ ହୋଇଛି। ରନ୍ ଚେଜ୍ରେ ବିରାଟ କୋହଲି ୭୪ ରନ୍ର ଚମତ୍କାର ଇନିଂସ ଖେଳି ଦଳକୁ ବିଜୟୀ କରାଇଥିବା ବେଳେ ଅଭିଜ୍ଞ ଓପନର୍ ରୋହିତ ଶର୍ମା ଖାତା ଖୋଲି ନପାରି ଶୂନରେ ଆଉଟ୍ ହୋଇଥିଲେ। ତେବେ ରୋହିତ ରନ୍ କରିନଥିଲେ ମଧ୍ୟ ମ୍ୟାଚ୍ର ମୋଡ଼ ବଦଳାଇବାରେ ତାଙ୍କର ବଡ଼ ଭୂମିକା ଥିଲା ବୋଲି କହିଛନ୍ତି ଅଧିନାୟକ ଶୁଭମନ ଗିଲ୍।
ପ୍ରକୃତରେ ନ୍ୟୁଜିଲାଣ୍ଡର ଡେରିଲ୍ ମିଚେଲଙ୍କୁ ରୋହିତ ଶର୍ମା ଚମତ୍କାର ଢଙ୍ଗରେ ରନ୍ଆଉଟ୍ କରିଥିଲେ। ଏହି ରନ୍ଆଉଟ୍ ମ୍ୟାଚ୍ର ଗତିପଥ ବଦଳାଇ ଦେଇଥିଲା ବୋଲି ଗିଲ୍ ମତ ଦେଇଛନ୍ତି। ପ୍ରଥମ ଇନିଂସରେ ଗ୍ଲେନ୍ ଫିଲିପ୍ସ ଓ ଡେରିଲ୍ ମିଚେଲଙ୍କ ମଧ୍ୟରେ ଏକ ଭଲ ଭାଗୀଦାରି ଗଢ଼ି ଉଠୁଥିବା ବେଳେ ରୋହିତଙ୍କ ଏହି ରନ୍ଆଉଟ୍ ଭାରତକୁ ବଡ଼ ସଫଳତା ଦେଇଥିଲା।
ରୋହିତଙ୍କ ରନ୍ଆଉଟ୍କୁ ନେଇ କ’ଣ କହିଲେ ଗିଲ୍?
ମ୍ୟାଚ୍ ପରବର୍ତ୍ତୀ ପୁରସ୍କାର ବିତରଣୀ ଉତ୍ସବରେ ଶୁଭମନ ଗିଲ୍ କହିଥିଲେ, ଆମ ଦଳର ବୋଲିଂ ବହୁତ ଭଲ ଥିଲା। ଫିଲ୍ଡିଂ ମଧ୍ୟ ଉଚ୍ଚକୋଟୀର ରହିଥିଲା। ବିଶେଷକରି ରୋହିତ ଭାଇଙ୍କ ସେହି ରନ୍ଆଉଟ୍ ମ୍ୟାଚ୍ର ମୋଡ଼ ବଦଳାଇ ଦେଇଥିଲା। ମିଚେଲ ଓ ଫିଲିପ୍ସଙ୍କ ଭାଗୀଦାରି ଆମ ପାଇଁ ବିପଜ୍ଜନକ ହେବାକୁ ଯାଉଥିଲା। ଭାରତରେ ମଧ୍ୟ ଆମେ ଦେଖିଛୁ ଯେ ଏହି ଦୁଇ ବ୍ୟାଟର୍ କେତେ ଭଲ ଖେଳନ୍ତି। ମୋଟାମୋଟି ଭାବେ ଆମ ଦଳର ପ୍ରଦର୍ଶନ ବେଶ୍ ଭଲ ରହିଥିଲା।
ଅଂଶୁଲ କାମ୍ବୋଜଙ୍କ ବୋଲିଂକୁ ପ୍ରଶଂସା
ଏହି ମ୍ୟାଚ୍ରେ ଭାରତୀୟ ଯୁବ ବୋଲର୍ ଅଂଶୁଲ କାମ୍ବୋଜ ଚମତ୍କାର ବୋଲିଂ କରିଥିଲେ। ସେ ୧୦ ଓଭରରେ ମାତ୍ର ୨୨ ରନ୍ ବ୍ୟୟ କରି ୨ଟି ୱିକେଟ୍ ଅକ୍ତିଆର କରିଥିଲେ। ଏହି ପ୍ରଦର୍ଶନ ପାଇଁ ତାଙ୍କୁ ‘ପ୍ଲେୟାର ଅଫ୍ ଦି ମ୍ୟାଚ୍’ ପୁରସ୍କାର ମିଳିଥିଲା।
ଅଂଶୁଲଙ୍କ ପ୍ରଦର୍ଶନକୁ ନେଇ ଗିଲ୍ କହିଥିଲେ, ଏଭଳି ପରିସ୍ଥିତି ପାଇଁ ଅଂଶୁଲ ଜଣେ ଉପଯୁକ୍ତ ବୋଲର୍। ସେ ସବୁବେଳେ ଦ୍ରୁତ ବୋଲିଂ କରିବା ସହ ବଲ୍କୁ ସିମ୍ କରାଇବାକୁ ଚେଷ୍ଟା କରନ୍ତି। ପୁରୁଣା ବଲ୍ରେ ମଧ୍ୟ ସେ ଭଲ ବୋଲିଂ କରିପାରନ୍ତି। ପିଚ୍ରୁ ବୋଲର୍ଙ୍କୁ ଅଧିକ ସହାୟତା ମିଳୁନଥିବା ବେଳେ ଅଂଶୁଲ ନିଜ ବୋଲିଂ ମାଧ୍ୟମରେ ଅତିରିକ୍ତ ବାଉନ୍ସ ସୃଷ୍ଟି କରିପାରିବେ ବୋଲି ଆମର ବିଶ୍ୱାସ ଥିଲା। ତାଙ୍କ ଗତି ଓ ଅନ୍ୟ ବୋଲର୍ଙ୍କ ସହ ମିଶି ଦଳ ପାଇଁ ଦେଇଥିବା ପ୍ରଦର୍ଶନ ଦେଖିବାକୁ ବେଶ୍ ଭଲ ଲାଗିଥିଲା ବୋଲି ଗିଲ୍ କହିଥିଲେ।
