ଆଇପିଏଲ୍ରେ ହାର୍ଦ୍ଦିକଙ୍କ ଟ୍ରେଡ୍କୁ ନେଇ ଚର୍ଚ୍ଚା; କେକେଆର୍କୁ ଭଲ ବିକଳ୍ପ କହିଲେ ଅଶ୍ୱିନ
ଭୁବନେଶ୍ୱର, : ଆଇପିଏଲ୍ର ଆଗାମୀ ସିଜନ୍ ପୂର୍ବରୁ ମୁମ୍ବାଇ ଇଣ୍ଡିଆନ୍ସର ଅଧିନାୟକ ହାର୍ଦ୍ଦିକ ପାଣ୍ଡ୍ୟାଙ୍କ ଭବିଷ୍ୟତକୁ ନେଇ କ୍ରିକେଟ୍ ମହଲରେ ଚର୍ଚ୍ଚା ଜୋର୍ ଧରିଛି। ସେ ମୁମ୍ବାଇ ଇଣ୍ଡିଆନ୍ସରେ ରହିବେ ନା ଅନ୍ୟ କୌଣସି ଦଳର ଜର୍ସି ପିନ୍ଧିବେ, ତାହାକୁ ନେଇ ବିଭିନ୍ନ ଆକଳନ କରାଯାଉଛି। ଏହି ଚର୍ଚ୍ଚା ମଧ୍ୟରେ ଭାରତର ପୂର୍ବତନ କ୍ରିକେଟର୍ ରବିଚନ୍ଦ୍ରନ ଅଶ୍ୱିନ ହାର୍ଦ୍ଦିକଙ୍କ ସମ୍ଭାବ୍ୟ ନୂଆ ଦଳ ସମ୍ପର୍କରେ ନିଜର ମତ ରଖିଛନ୍ତି। ଅଶ୍ୱିନଙ୍କ ମତରେ, କୋଲକାତା ନାଇଟ୍ ରାଇଡର୍ସ (କେକେଆର୍) ହାର୍ଦ୍ଦିକଙ୍କ ପାଇଁ ଏକ ବିକଳ୍ପ ହୋଇପାରେ। ଏଠାରେ ତାଙ୍କୁ ଖେଳିବା ସହ ଅଧିନାୟକ ହେବାର ସୁଯୋଗ ମଧ୍ୟ ମିଳିପାରେ।
ନିଜ ୟୁଟ୍ୟୁବ୍ ଚ୍ୟାନେଲ୍ରେ ହାର୍ଦ୍ଦିକଙ୍କ ସମ୍ଭାବ୍ୟ ଟ୍ରେଡ୍ ସମ୍ପର୍କରେ ଆଲୋଚନା କରି ଅଶ୍ୱିନ କହିଛନ୍ତି ଯେ, କେକେଆର୍ରେ ହାର୍ଦ୍ଦିକ ଅଧିନାୟକ ଦାୟିତ୍ୱ ତୁଲାଇପାରନ୍ତି। ଏହି ସମ୍ଭାବ୍ୟ ଟ୍ରେଡ୍ ଆଲୋଚନାରେ ଅଶ୍ୱିନ ହର୍ଷିତ ରାଣା ଓ ରିଙ୍କୁ ସିଂହଙ୍କ ନାମ ମଧ୍ୟ ଉଲ୍ଲେଖ କରିଛନ୍ତି। ତେବେ ଏହା କେବଳ ତାଙ୍କର ଆକଳନ। ହାର୍ଦ୍ଦିକଙ୍କୁ ନେଇ କୌଣସି ଟ୍ରେଡ୍ ସମ୍ପର୍କରେ ଏପର୍ଯ୍ୟନ୍ତ ଆନୁଷ୍ଠାନିକ ଘୋଷଣା ହୋଇନାହିଁ।
ଗୁଜରାଟ ଟାଇଟନ୍ସ ମଧ୍ୟ ହୋଇପାରେ ବିକଳ୍ପ
ହାର୍ଦ୍ଦିକଙ୍କ ପୂର୍ବତନ ଦଳ ଗୁଜରାଟ ଟାଇଟନ୍ସ (ଜିଟି)କୁ ନେଇ ମଧ୍ୟ ଅଶ୍ୱିନ ଏକ ପ୍ରସ୍ତାବ ରଖିଛନ୍ତି। ହାର୍ଦ୍ଦିକଙ୍କ ବଦଳରେ ଗୁଜରାଟ ଟାଇଟନ୍ସ ରସିଦ ଖାନ୍ଙ୍କୁ ମୁମ୍ବାଇ ଇଣ୍ଡିଆନ୍ସ ସହ ଟ୍ରେଡ୍ କରିପାରେ ବୋଲି ସେ ଆକଳନ କରିଛନ୍ତି। ଏହା ବ୍ୟତୀତ ରାଜସ୍ଥାନ ରୟାଲ୍ସର ଖେଳାଳି ବିକଳ୍ପ ଆଲୋଚନାରେ ଯଶସ୍ୱୀ ଜୟସ୍ୱାଲ ଓ ସାମ୍ କରନ୍ଙ୍କ ଭଳି ଖେଳାଳିଙ୍କ ନାମ ମଧ୍ୟ ଉଠିଛି।
ଅଶ୍ୱିନଙ୍କ ମତରେ, ମୁମ୍ବାଇ ଇଣ୍ଡିଆନ୍ସକୁ ଜଣେ ଭାରତୀୟ ୱିକେଟ୍କିପରଙ୍କ ଆବଶ୍ୟକତା ରହିଛି। ଏଥିସହ ଦଳ ନିଜର ବୋଲିଂ ବିଭାଗକୁ ଆହୁରି ମଜବୁତ କରିବାକୁ ଚାହିଁବ।
ଏହି ୫ ଦଳକୁ ନେଇ ଅଶ୍ୱିନଙ୍କ ଆକଳନ
ହାର୍ଦ୍ଦିକଙ୍କୁ ନିଜ ଦଳରେ ସାମିଲ କରିବା ସମ୍ଭାବନା ଥିବା ଦଳଗୁଡ଼ିକ ମଧ୍ୟରେ ଅଶ୍ୱିନ ଚେନ୍ନାଇ ସୁପର କିଙ୍ଗ୍ସ (ସିଏସ୍କେ), କୋଲକାତା ନାଇଟ୍ ରାଇଡର୍ସ (କେକେଆର୍), ରାଜସ୍ଥାନ ରୟାଲ୍ସ (ଆର୍ଆର୍), ଗୁଜରାଟ ଟାଇଟନ୍ସ (ଜିଟି) ଓ ପଞ୍ଜାବ କିଙ୍ଗ୍ସ (ପିବିକେଏସ୍)ର ନାମ ନେଇଛନ୍ତି। ଅନ୍ୟପକ୍ଷରେ, ଲକ୍ଷ୍ନୌ ସୁପର ଜାଏଣ୍ଟସ୍ (ଏଲ୍ଏସ୍ଜି) ଏହି ଦୌଡ଼ରେ ସାମିଲ ହେବାର ସମ୍ଭାବନାକୁ ସେ ଖାରଜ କରିଛନ୍ତି।
ଅଧିନାୟକ ପଦ ଆଉ ମୁଖ୍ୟ ସର୍ତ୍ତ ନୁହେଁ
ଅଶ୍ୱିନଙ୍କ ମତରେ, ଆଗାମୀ ଆଇପିଏଲ୍ରେ ହାର୍ଦ୍ଦିକଙ୍କ ପାଇଁ ଅଧିନାୟକ ପଦ ଆଉ ଏକମାତ୍ର ପ୍ରାଥମିକତା ହୋଇ ନପାରେ। ନିଜ ପାଇଁ ଉପଯୁକ୍ତ ଦଳ ବାଛିବା ଉପରେ ସେ ଗୁରୁତ୍ୱ ଦେଇପାରନ୍ତି। ତେବେ ହାର୍ଦ୍ଦିକ ମୁମ୍ବାଇ ଇଣ୍ଡିଆନ୍ସ ଛାଡ଼ିବେ କି ନାହିଁ, ସେ ସମ୍ପର୍କରେ ଏପର୍ଯ୍ୟନ୍ତ କୌଣସି ଆନୁଷ୍ଠାନିକ ଘୋଷଣା ହୋଇନାହିଁ।
