India Pakistan War Situation: ଭାରତର ‘ଅପରେସନ୍ ସିନ୍ଦୂର’ ଆରମ୍ଭ ହେବା ପରେ ବର୍ତ୍ତମାନ ରାଗରେ ଅଛି ପାକିସ୍ତାନ । ପାକିସ୍ତାନ ସେନା ପକ୍ଷରୁ ଗୁରୁବାର ରାତିରେ ଭାରତର ଉତ୍ତର ଏବଂ ପଶ୍ଚିମ ଅଞ୍ଚଳରେ ଥିବା ଅନେକ ସାମରିକ ଘାଟି ଉପରେ ଡ୍ରୋନ୍ ଏବଂ କ୍ଷେପଣାସ୍ତ୍ର ଆକ୍ରମଣ କରିବାକୁ ଚେଷ୍ଟା କରାଯାଇଥିଲା। କିନ୍ତୁ ଭାରତ S-400 ବାୟୁ ପ୍ରତିରକ୍ଷା ପ୍ରଣାଳୀ ମାଧ୍ୟମରେ ଏହି ଆକ୍ରମଣଗୁଡ଼ିକୁ ପଣ୍ଡ କରିଥିଲା। ଏହି ସୂଚନା ବୈଦେଶିକ ମନ୍ତ୍ରଣାଳୟ ପକ୍ଷରୁ ଏକ ସାମ୍ବାଦିକ ସମ୍ମିଳନୀରେ ଗଣମାଧ୍ୟମକୁ ଦିଆଯାଇଛି। ଭାରତୀୟ ସେନାର କର୍ଣ୍ଣେଲ ସୋଫିଆ କୁରେଶୀ ଆଜି କହିଛନ୍ତି ଯେ, ପ୍ରାଥମିକ ତଦନ୍ତରେ ପାକିସ୍ତାନୀ ସେନା ଦ୍ୱାରା କରାଯାଇଥିବା ଆକ୍ରମଣରେ ତୁର୍କୀ ଡ୍ରୋନର ଭଗ୍ନାବଶେଷ ମିଳିଛି। ସେ ଏକଥା ମଧ୍ୟ କହିଛନ୍ତି ଯେ, ପାକିସ୍ତାନୀ ସେନା ପଶ୍ଚିମ ସୀମାରେ ୩୬ ଟି ସ୍ଥାନରେ ସାମରିକ ପ୍ରତିଷ୍ଠାନ ଉପରେ ଆକ୍ରମଣ କରିବାକୁ ଚେଷ୍ଟା କରିଥିଲା।
ଆଜି ସନ୍ଧ୍ୟା ୫:୩୦ ରେ ବୈଦେଶିକ ବ୍ୟାପାର ମନ୍ତ୍ରଣାଳୟ ପକ୍ଷରୁ ଏକ ସାମ୍ୱାଦିକ ସମ୍ମୀଳନୀ କରାଯାଇଥିଲା। ବୈଦେଶିକ ସଚିବ ବିକ୍ରମ ମିଶ୍ରୀ, କର୍ଣ୍ଣେଲ ସୋଫିଆ କୁରେଶୀ ଏବଂ ୱିଙ୍ଗ କମାଣ୍ଡର ବ୍ୟୋମିକା ସିଂହ ଅପରେସନ ସିନ୍ଦୂର ବିଷୟରେ ନୂଆ ଅପଡେଟ୍ ପ୍ରଦାନ କରିଥିଲେ । କର୍ଣ୍ଣେଲ ସୋଫିଆ କୁରେଶୀ କହିଛନ୍ତି ଯେ, ପାକିସ୍ତାନ ନିୟନ୍ତ୍ରଣ ରେଖା ଉପରେ ପ୍ରବଳ ଗୁଳିମାଡ଼ କରିଥିଲା ଏବଂ ଅନୁପ୍ରବେଶ ଉଦ୍ୟମ କରାଯାଇଥିଲା। ତଙ୍ଗଧର, ଉରି ଏବଂ ଉଧାରପୁରରେ ପ୍ରବଳ ଗୁଳିବର୍ଷା ହୋଇଥିଲା। ପାକିସ୍ତାର ଗୁଳିମାଡ଼ କାରଣରୁ କ୍ଷତି ମଧ୍ୟ ହୋଇଛି। କିଛି ଫଟୋ ଦେଖାଇ ସେ କହିଥିଲେ ଯେ, ଭାରତୀୟ ବାୟୁସେନା ବହୁତ ସଂଯମତା ଦେଖାଇଛି।
କର୍ଣ୍ଣେଲ ସୋଫିଆ କୁରେଶୀଙ୍କ କହିବାନୁଯାୟୀ, ମଇ ୭ ଏବଂ ୮ ତାରିଖ ରାତି ସମୟରେ ପାକିସ୍ତାନୀ ସେନା ସାମରିକ ଭିତ୍ତିଭୂମିକୁ ଟାର୍ଗେଟ କରିବା ଉଦ୍ଦେଶ୍ୟରେ ସମଗ୍ର ପଶ୍ଚିମ ସୀମାରେ ବହୁବାର ଭାରତୀୟ ବାୟୁସୀମା ଉଲ୍ଲଂଘନ କରିଥିଲା।’ କେବଳ ଏତିକି ନୁହେଁ, ପାକିସ୍ତାନୀ ସେନା ନିୟନ୍ତ୍ରଣ ରେଖାରେ ଭାରୀ କ୍ୟାଲିବର ଅସ୍ତ୍ରଶସ୍ତ୍ର ମଧ୍ୟ ମାଡ଼ କରିଥିଲେ। ୩୬ଟି ସ୍ଥାନରେ ଅନୁପ୍ରବେଶ ଚେଷ୍ଟା କରିବା ପାଇଁ ପ୍ରାୟ ୩୦୦ ରୁ ୪୦୦ ଡ୍ରୋନ୍ ବ୍ୟବହାର କରାଯାଇଥିଲା। ଭାରତୀୟ ସଶସ୍ତ୍ର ବାହିନୀ ଗତିଜ ଏବଂ ଅଣ-ଗତିଜ ଉପାୟ ବ୍ୟବହାର କରି ଏହି ଡ୍ରୋନଗୁଡ଼ିକ ମଧ୍ୟରୁ ଅନେକକୁ ତଳକୁ ଖସାଇବାରେ ସକ୍ଷମ ହୋଇଥିଲେ। ଏତେ ବଡ଼ ଆକାଶ ମାର୍ଗରେ ହୋଇଥିବା ଅନୁପ୍ରବେଶର ସମ୍ଭାବ୍ୟ ଉଦ୍ଦେଶ୍ୟ ଥିଲା ବାୟୁ ପ୍ରତିରକ୍ଷା ପ୍ରଣାଳୀର ପରୀକ୍ଷା କରିବା ଏବଂ ଗୁପ୍ତ ସୂଚନା ସଂଗ୍ରହ କରିବା। ଆଜି ଡ୍ରୋନ୍ ଭଗ୍ନାବଶେଷ ମିଳିବା ପରେ ତାହାର ଫୋରେନସିକ୍ ତଦନ୍ତ କରାଯାଉଛି। ପ୍ରାରମ୍ଭିକ ରିପୋର୍ଟରୁ ଜଣାପଡୁଛି ଯେ, ସେଗୁଡ଼ିକ ତୁର୍କୀ ଆସିସଗାର୍ଡ ସୋଙ୍ଗାର ଡ୍ରୋନ। କର୍ଣ୍ଣେଲ କୁରେଶୀ ଏକଥା ମଧ୍ୟ କହିଛନ୍ତି, ‘ଲେହରୁ ସାର କ୍ରିକ ପର୍ଯ୍ୟନ୍ତ, ପାକିସ୍ତାନୀ ସେନା ଅନୁପ୍ରବେଶ ପାଇଁ ଡ୍ରୋନ ବ୍ୟବହାର କରିଥିଲା।’
ଭାରତୀୟ ବାୟୁସେନାର ୱିଙ୍ଗ କମାଣ୍ଡର ବ୍ୟୋମିକା ସିଂହ ଗଣମାଧ୍ୟମକୁ ପ୍ରତିକ୍ରିୟା ଦେଇ କହିଛନ୍ତି ଯେ, “ପାକିସ୍ତାନ ୭ ମଇ ରାତି ୮:୩୦ ରେ ଏକ ଅସଫଳ ଅପ୍ରରୋଚନାପୂର୍ଣ୍ଣ ଡ୍ରୋନ୍ ଏବଂ କ୍ଷେପଣାସ୍ତ୍ର ଆକ୍ରମଣ କରିବା ସତ୍ତ୍ୱେ ଏହାର ବେସାମରିକ ବିମାନ ବନ୍ଦ କରିନାହିଁ। ପାକିସ୍ତାନ ବେସାମରିକ ବିମାନକୁ ଢାଲ ଭାବରେ ବ୍ୟବହାର କରୁଛି । ଏହା ଭଲ ଭାବରେ ପାକିସ୍ତାନ ଜାଣେ ଯେ, ଭାରତ ଉପରେ ଏହାର ଆକ୍ରମଣ ଦେଶ ପକ୍ଷରୁ ଏକ ଦ୍ରୁତ ବାୟୁ ପ୍ରତିରକ୍ଷା ପ୍ରତିକ୍ରିୟା ଆଣିବ। ଭାରତ ଏବଂ ପାକିସ୍ତାନ ମଧ୍ୟରେ ଅନ୍ତର୍ଜାତୀୟ ସୀମା ନିକଟରେ ଉଡ଼ୁଥିବା ଆନ୍ତର୍ଜାତୀୟ ବିମାନ ସମେତ ମାନବହୀନ ବେସାମରିକ ବିମାନ ପାଇଁ ଏହା ନିରାପଦ ନୁହେଁ। ଦେଖାଥିବା ସ୍କ୍ରିନସଟରେ ପଞ୍ଜାବ ସେକ୍ଟରରେ ଏକ ଉଚ୍ଚ ବାୟୁ ପ୍ରତିରକ୍ଷା ସତର୍କତା ପରିସ୍ଥିତି ସମୟରେ ଆପ୍ଲିକେସନ୍ ଫ୍ଲାଇଟ୍ ରାଡାର ୨୪ ରୁ ତଥ୍ୟ ଦର୍ଶାଉଛି। ଭାରତ ପାର୍ଶ୍ୱରେ ବାୟୁସେନା ସମ୍ପୂର୍ଣ୍ଣ ଭାବରେ ବେସାମରିକ ବିମାନ ଯାତାୟାତରୁ ମୁକ୍ତ। କିନ୍ତୁ କରାଚୀ ଏବଂ ଲାହୋର ମଧ୍ୟରେ ବାୟୁ ରୁଟରେ ବେସାମରିକ ବିମାନ ଉଡ଼ୁଛି। ଭାରତୀୟ ବାୟୁସେନା ଏହାର ପ୍ରତିକ୍ରିୟାରେ ବହୁତ ସଂଯମତା ଦେଖାଇଛି, ଆନ୍ତର୍ଜାତୀୟ ବେସାମରିକ ବାହକମାନଙ୍କର ସୁରକ୍ଷା ସୁନିଶ୍ଚିତ କରୁଛି।”
ବୈଦେଶିକ ସଚିବ ବିକ୍ରମ ମିଶ୍ରୀ କହିଛନ୍ତି ଯେ, ପାକିସ୍ତାନ ନିୟନ୍ତ୍ରଣ ରେଖା ପାର୍ଶ୍ୱରେ କାନ୍ଦାହାର, ଉରି, ପୁଞ୍ଚ, ରାଜୌରୀ, ଅଖନୁର ଏବଂ ଉଧମପୁର ଭଳି ଅଞ୍ଚଳରେ ଗୁଳିବର୍ଷା କରି ଭାରତ ବିରୁଦ୍ଧରେ ଉତ୍ତେଜନାମୂଳକ ସାମରିକ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଏହି ଆକ୍ରମଣରେ ଭାରତୀୟ ସୁରକ୍ଷା ବାହିନୀ ମଧ୍ୟ କିଛି କ୍ଷତି ସହିଛି । କିଛି ଜବାନ ଆହତ ମଧ୍ୟ ହୋଇଛନ୍ତି । ତଥାପି, ପାକିସ୍ତାନୀ ସେନା ମଧ୍ୟ ଭାରୀ କ୍ଷତି ସହିଛି। ମିଶ୍ରୀ ଏହା ମଧ୍ୟ କହିଛନ୍ତି ଯେ, ବିଫଳ ଡ୍ରୋନ୍ ଆକ୍ରମଣ ପ୍ରୟାସ ସତ୍ତ୍ୱେ ପାକିସ୍ତାନ ତାର ବେସାମରିକ ଆକାଶପଥ ବନ୍ଦ କରିନାହିଁ, ଯାହା ଏକ ବିପଦପୂର୍ଣ୍ଣ ଏବଂ ଦାୟିତ୍ୱହୀନ ପଦକ୍ଷେପ। ସେ କହିଛନ୍ତି ଯେ, ପାକିସ୍ତାନ ବେସାମରିକ ବିମାନକୁ ଢାଲ ଭାବରେ ବ୍ୟବହାର କରୁଛି, ଯାହା ଦ୍ୱାରା କେବଳ ପାକିସ୍ତାନ ନୁହେଁ ବରଂ ଅନ୍ତର୍ଜାତୀୟ ବିମାନଗୁଡ଼ିକର ସୁରକ୍ଷା ମଧ୍ୟ ବିପଦରେ ପଡ଼ୁଛି। ବୈଦେଶିକ ସଚିବ ଏକଥା କହିଛନ୍ତି ଯେ, “ଗୁରୁବାର ରାତିରେ ପାକିସ୍ତାନର ଏହି ଉତ୍ତେଜନାମୂଳକ ଏବଂ ଆକ୍ରମଣାତ୍ମକ କାର୍ଯ୍ୟ ଭାରତୀୟ ସହର ଏବଂ ବେସାମରିକ ଭିତ୍ତିଭୂମି ଏବଂ ସାମରିକ ପ୍ରତିଷ୍ଠାନକୁ ଟାର୍ଗେଟ କରିଥିଲା। ଭାରତୀୟ ସଶସ୍ତ୍ର ବାହିନୀ ସମାନୁପାତିକ, ପର୍ଯ୍ୟାପ୍ତ ଏବଂ ଦାୟିତ୍ୱପୂର୍ଣ୍ଣ ଭାବରେ ଜବାବ ଦେଇଥିଲା।
