ନୂଆଦିଲ୍ଲୀ: ଭାରତୀୟ କ୍ରିକେଟର ଉଦୀୟମାନ ତାରକା ବୈଭବ ସୂର୍ଯ୍ୟବଂଶୀଙ୍କୁ ମାତ୍ର ୧୫ ବର୍ଷ ବୟସରେ ବଡ଼ ଦାୟିତ୍ୱ ମିଳିଛି। ଜିମ୍ବାୱେ ବିପକ୍ଷ ଟି-୨୦ ସିରିଜରେ ଚମତ୍କାର ପ୍ରଦର୍ଶନ ପରେ ବିସିସିଆଇ ତାଙ୍କୁ ଦୁଲିପ ଟ୍ରଫି-୨୦୨୬ ପାଇଁ ପୂର୍ବାଞ୍ଚଳ (ଇଷ୍ଟ ଜୋନ୍) ଦଳର ଉପଅଧିନାୟକ ଭାବେ ନିଯୁକ୍ତ କରିଛି। ଏହା ଭାରତୀୟ କ୍ରିକେଟରେ ତାଙ୍କ ନେତୃତ୍ୱ କ୍ଷମତା ଉପରେ ଚୟନକର୍ତ୍ତାଙ୍କ ଆସ୍ଥାକୁ ସ୍ପଷ୍ଟ କରୁଛି।
ବିସିସିଆଇ କେବଳ ବୈଭବଙ୍କୁ ଜଣେ ପ୍ରତିଭାବାନ ବ୍ୟାଟର ଭାବେ ନୁହେଁ, ଭବିଷ୍ୟତର ଜଣେ ନେତା ଭାବେ ମଧ୍ୟ ପ୍ରସ୍ତୁତ କରିବାକୁ ଚାହୁଁଛି। ଏତେ କମ୍ ବୟସରେ ଉପଅଧିନାୟକ ପଦ ମିଳିବା ତାଙ୍କ ପାଇଁ ଏକ ବଡ଼ ସଫଳତା।
ଜିମ୍ବାୱେ ସିରିଜରେ ଥିଲା ଦମଦାର ପ୍ରଦର୍ଶନ
ସମ୍ପ୍ରତି ଜିମ୍ବାୱେ ବିପକ୍ଷ ତିନି ମ୍ୟାଚ୍ ବିଶିଷ୍ଟ ଟି-୨୦ ସିରିଜରେ ବୈଭବ ସୂର୍ଯ୍ୟବଂଶୀ ଦୁଇଟି ଅର୍ଦ୍ଧଶତକ ହାସଲ କରି ଭାରତର ବିଜୟରେ ଗୁରୁତ୍ୱପୂର୍ଣ୍ଣ ଭୂମିକା ନେଇଥିଲେ। ସେ ଆନ୍ତର୍ଜାତିକ କ୍ରିକେଟରେ ଭାରତ ପକ୍ଷରୁ ସର୍ବକନିଷ୍ଠ ବୟସରେ ଅର୍ଦ୍ଧଶତକ ହାସଲ କରିବାର କୀର୍ତ୍ତିମାନ ମଧ୍ୟ ସ୍ଥାପନ କରିଥିଲେ। ସିରିଜରେ ସର୍ବାଧିକ ରନ୍ କରିଥିବା ବ୍ୟାଟର ଭାବେ ସେ ‘ପ୍ଲେୟର ଅଫ୍ ଦ ସିରିଜ୍’ ପୁରସ୍କାର ଜିତିଥିଲେ।
ଇଷାନ କିଶନଙ୍କୁ ମିଳିଲା ଅଧିନାୟକତ୍ୱ
ଦୁଲିପ ଟ୍ରଫି-୨୦୨୬ ପାଇଁ ଇଷ୍ଟ ଜୋନ୍ ଦଳର ନେତୃତ୍ୱ ୱିକେଟକିପର-ବ୍ୟାଟର ଇଷାନ କିଶନଙ୍କୁ ଦିଆଯାଇଛି। ଘରୋଇ କ୍ରିକେଟରେ ଝାଡ଼ଖଣ୍ଡ ଦଳର ଅଧିନାୟକ ଥିବା ଇଷାନ ୨୦୨୫ ସୟଦ ମୁସ୍ତାକ ଅଲୀ ଟ୍ରଫିରେ ନିଜ ଦଳକୁ ଚାମ୍ପିଅନ୍ କରାଇଥିଲେ। ଏବେ ତାଙ୍କ ନେତୃତ୍ୱରେ ଇଷ୍ଟ ଜୋନ୍ ଦୁଲିପ ଟ୍ରଫି ଜିତିବ ବୋଲି ଚୟନକର୍ତ୍ତାମାନେ ଆଶା ରଖିଛନ୍ତି।
ବିହାର କ୍ରିକେଟ ସଂଘର ଖୁସି
ବିହାର କ୍ରିକେଟ ଆସୋସିଏସନ୍ର ସଭାପତି ହର୍ଷ ବର୍ଦ୍ଧନ ବୈଭବଙ୍କ ସଫଳତାକୁ ପ୍ରଶଂସା କରି କହିଛନ୍ତି ଯେ, ଏତେ କମ୍ ବୟସରେ ପୂର୍ବାଞ୍ଚଳ ଦଳର ଉପଅଧିନାୟକ ହେବା ବିହାର କ୍ରିକେଟ ପାଇଁ ଗର୍ବର ବିଷୟ। ତାଙ୍କ ଚମତ୍କାର ପ୍ରଦର୍ଶନ ଓ ପରିପକ୍ୱ ବ୍ୟାଟିଂ ଚୟନକର୍ତ୍ତାଙ୍କ ବିଶ୍ୱାସ ଜିତିଛି। ବୈଭବ ଏହି ଦଳରେ ସ୍ଥାନ ପାଇଥିବା ବିହାରର ଏକମାତ୍ର ଖେଳାଳି। ଦଳରେ ବଙ୍ଗ ଓ ଝାଡ଼ଖଣ୍ଡର ସର୍ବାଧିକ ଖେଳାଳି ରହିଛନ୍ତି।
ଦୁଲିପ ଟ୍ରଫି-୨୦୨୬ ଇଷ୍ଟ ଜୋନ୍ ଦଳ
ଇଷାନ କିଶନ (ଅଧିନାୟକ), ବୈଭବ ସୂର୍ଯ୍ୟବଂଶୀ (ଉପଅଧିନାୟକ), ଅଭିମନ୍ୟୁ ଈଶ୍ୱରନ, ସୁଦୀପ କୁମାର ଘରାମୀ, ଶାହବାଜ ଅହମଦ, ସୂରଜ ସିନ୍ଧୁ ଜୈସ୍ୱାଲ, ମହମ୍ମଦ ଶାମି, ମୁକେଶ କୁମାର, କୁମାର କୁଶାଗ୍ର, ଶିକ୍ଜର ମୋହନ, ଅନୁକୂଳ ରୟ, ବିରାଟ ସିଂହ, ସୁଭ୍ରାଂଶୁ ସେନାପତି, ଦେନିଶ ଦାସ ଏବଂ ଅଭିଜିତ ସରକାର।
