ନୂଆଦିଲ୍ଲୀ: ନ୍ୟୁଜିଲାଣ୍ଡ ଗସ୍ତରେ ଭାରତୀୟ କ୍ରିକେଟ୍ ଦଳ ବୁଧବାର (ନଭେମ୍ବର ୪)ରୁ ୫ ମ୍ୟାଚ୍ ବିଶିଷ୍ଟ ଦିନିକିଆ ସିରିଜ୍ ଖେଳିବାକୁ ଯାଉଛି। ଏହା ପୂର୍ବରୁ ଟିମ୍ ଇଣ୍ଡିଆ ପାଇଁ ଏକ ବଡ଼ ଖୁସି ଖବର ଆସିଛି। ଦଳର ଷ୍ଟାର୍ ଦ୍ରୁତ ବୋଲର୍ ପ୍ରସିଦ୍ଧ କୃଷ୍ଣାଙ୍କୁ ଭାରତୀୟ କ୍ରିକେଟ୍ କଣ୍ଟ୍ରୋଲ ବୋର୍ଡ (ବିସିସିଆଇ)ର ସେଣ୍ଟର ଅଫ୍ ଏକ୍ସଲେନ୍ସ (CoE) ପକ୍ଷରୁ ତିନୋଟି ଯାକ ଫର୍ମାଟ୍ ପାଇଁ ଫିଟ୍ ଘୋଷଣା କରାଯାଇଛି।
ନ୍ୟୁଜିଲାଣ୍ଡ ବିପକ୍ଷ ଦିନିକିଆ ସିରିଜ୍ ପାଇଁ ଭାରତୀୟ ଦଳ ଘୋଷଣା ବେଳେ ପ୍ରସିଦ୍ଧ କୃଷ୍ଣାଙ୍କୁ ପ୍ରଥମ ୩ଟି ମ୍ୟାଚ୍ ପାଇଁ ଦଳରେ ସ୍ଥାନ ମିଳିଥିଲା। କିନ୍ତୁ ପରେ ଆହତ ସମସ୍ୟା ଯୋଗୁଁ ସେ ସିରିଜ୍ରୁ ବାଦ୍ ପଡ଼ିଥିବା ବିସିସିଆଇ ସୂଚନା ଦେଇଥିଲା।
କ୍ରିକ୍ବଜ୍ର ଏକ ରିପୋର୍ଟ ଅନୁଯାୟୀ, ବେଙ୍ଗାଲୁରୁସ୍ଥିତ ସେଣ୍ଟର ଅଫ୍ ଏକ୍ସଲେନ୍ସରେ ଗତ ଦୁଇ ଦିନ ଧରି ହୋଇଥିବା ସିମୁଲେସନ୍ ଟେଷ୍ଟରେ ସଫଳ ହେବା ପରେ ମେଡିକାଲ୍ ଟିମ୍ ତାଙ୍କୁ ଫିଟ୍ ଘୋଷଣା କରିଛି। ଖୁବ୍ଶୀଘ୍ର ସେ ନ୍ୟୁଜିଲାଣ୍ଡ ଗସ୍ତ କରିବେ ବୋଲି ଆଶା କରାଯାଉଛି। ସମ୍ଭବତଃ ଆଗାମୀ ଉପଲବ୍ଧ ବିମାନରେ ସେ ନ୍ୟୁଜିଲାଣ୍ଡ ଯାତ୍ରା କରିବେ।
ନଭେମ୍ବର ୭ରୁ ଭାରତ-ଏ ଓ ନ୍ୟୁଜିଲାଣ୍ଡ-ଏ ମଧ୍ୟରେ ଆରମ୍ଭ ହେବାକୁ ଥିବା ତୃତୀୟ ତଥା ଶେଷ ଅଣଆନୁଷ୍ଠାନିକ ଟେଷ୍ଟ ମ୍ୟାଚ୍ରେ ସେ ଖେଳିବାର ସମ୍ଭାବନା ରହିଛି। ତେବେ ନ୍ୟୁଜିଲାଣ୍ଡ ବିପକ୍ଷ ଦିନିକିଆ ସିରିଜ୍ରେ ସେ ଖେଳିବେ ନାହିଁ।
ୱେଷ୍ଟଇଣ୍ଡିଜ୍ ସିରିଜ୍ରେ ଆହତ ହୋଇଥିଲେ
ସୂଚନାଯୋଗ୍ୟ, ଗତ ସେପ୍ଟେମ୍ବର ୩୦ରେ ଗୁଆହାଟୀରେ ୱେଷ୍ଟଇଣ୍ଡିଜ୍ ବିପକ୍ଷ ଦ୍ୱିତୀୟ ଦିନିକିଆ ମ୍ୟାଚ୍ ଖେଳୁଥିବା ସମୟରେ ପ୍ରସିଦ୍ଧ କୃଷ୍ଣା ହାମଷ୍ଟ୍ରିଙ୍ଗ୍ ଆଘାତର ଶିକାର ହୋଇଥିଲେ। ଏହି କାରଣରୁ ସେ ନ୍ୟୁଜିଲାଣ୍ଡ ବିପକ୍ଷ ଦିନିକିଆ ସିରିଜ୍ରୁ ବାଦ୍ ପଡ଼ିଥିଲେ। ତେବେ ଆଗାମୀ ଦୁଇ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ରେ ସେ ଖେଳୁଥିବା ଦେଖିବାକୁ ମିଳିପାରେ।
ପ୍ରସିଦ୍ଧ କୃଷ୍ଣାଙ୍କ ଅନ୍ତର୍ଜାତୀୟ କ୍ୟାରିୟର
ପ୍ରସିଦ୍ଧ କୃଷ୍ଣା ଭାରତ ପାଇଁ ତିନୋଟି ଯାକ ଫର୍ମାଟ୍ରେ ଖେଳିଛନ୍ତି। ଏପର୍ଯ୍ୟନ୍ତ ସେ ୯ଟି ଟେଷ୍ଟ, ୩୦ଟି ଦିନିକିଆ ଏବଂ ୮ଟି ଟି-୨୦ ଅନ୍ତର୍ଜାତୀୟ ମ୍ୟାଚ୍ ଖେଳିଛନ୍ତି।
ଟେଷ୍ଟ କ୍ରିକେଟ୍ର ୧୭ଟି ଇନିଂସ୍ରେ ୩୦.୩୪ ହାରରେ ୩୨ଟି ୱିକେଟ୍ ନେଇଛନ୍ତି। ତାଙ୍କର ଶ୍ରେଷ୍ଠ ପ୍ରଦର୍ଶନ ୮/୧୮୮। ସେହିପରି ଦିନିକିଆର ୩୦ଟି ଇନିଂସ୍ରେ ୨୭.୦୯ ହାରରେ ୫୩ଟି ୱିକେଟ୍ ଅକ୍ତିଆର କରିଛନ୍ତି। ଏହି ଫର୍ମାଟ୍ରେ ତାଙ୍କର ଶ୍ରେଷ୍ଠ ପ୍ରଦର୍ଶନ ୫/୨୩ ରହିଛି।
ଅନ୍ୟପକ୍ଷରେ ଟି-୨୦ ଅନ୍ତର୍ଜାତୀୟର ୮ଟି ଇନିଂସ୍ରେ ସେ ୯ଟି ୱିକେଟ୍ ନେଇଛନ୍ତି। ଏହି ଫର୍ମାଟ୍ରେ ତାଙ୍କର ଶ୍ରେଷ୍ଠ ବୋଲିଂ ପ୍ରଦର୍ଶନ ୩/୪୧ ରହିଛି। ତେବେ ତାଙ୍କର ଇକୋନୋମି ରେଟ୍ ୧୧ ରହିଛି।
